سازمانی خهباتی کوردستانی ئێران
بەپێی ئەو ڕاپۆرتانە کە لە تەشکیلاتی ناوخۆی سازمانی خەبات پێمان گەیشتوە، لقی یەکیمی دادگای بەناو ئینقلابی سەقز داواکاری ئازادکردنی مەرجداری حەسەن بەهاری، بەندکراوی سیاسی تەمەن ۵۸ ساڵ و باوکی ۶ منداڵی ڕەتکردووەتەوە. ئەم بڕیارە نادادپەروەرانە لە کاتێکدا دراوە کە ناوبراو دۆخی تەندروستی زۆر خراپە و بەهۆی تووشبوونی بە دیسکی قورسی مل، دەستی چەپی لەکارکەوتووە و پێویستی بە نەشتەرگەرییەکی بەپەلە هەیە.
حەسەن بەهاری دوای تێپەڕاندنی ۵ ساڵ زیندانی تەعزیری لە زیندانی ناوەندی سەقز، ئێستا ماوەی سزاکەی بە پابەندی ئەلیکترۆنی لەژێر چاودێریی ماڵەوەدا بەسەر دەبات. ناوبراو کە پێشتر بە تۆمەتی سیاسی سزای ۱۲ ساڵ و ۷ مانگ زیندانی بەسەردا سەپابوو، لە ئێستاداکاتدا بەدەست نەخۆشی شەکرە و پەستانی خوێنی بەرزەوە دۆخی تەندروستی ناجێگیرەو ڕێگریگرتن لە چارەسەرکردنی، مەترسییەکی جیدی لەسەر ژیانی دروستکردووە.
