پێناسەم ١٠ ی خەزەلوەرە.

لە دەنگی شەپۆلی ئاو دا،
 لە هاژەی چەم و رووباردا،
 

لە گڤەگڤی با دا،
 لە نرکە و گرمەی هەور دا،
 لە چەخماخە و قریشکە و تریشکەی بروسکەدا،
لەتریفەی مانگە شەوی سەر بەفری کڕ و
بەستەڵەکی شەوانی ساماڵ و سڕ دا،
 لە کڵپە و هەناوی گڕ دا،
 لە دووتوێ تاریکە شەو دا،
لە ناو بێداری و لەخەو دا،
لە ناو گەڕی سەما و
رەشبەڵەکی پاییزی گەڵا رێزان دا،
لە سوور و خوولی سروشت و
 وەرزەکانی نیشتمان دا،
 لە ناو کۆڕی هەڵوەرینی گەڵای دار بەرووی
 چیای بەرزی کوردستان دا،
لە ناو تەزوی گژەبا و تۆفی زستان دا،
 لە بن باڵی پاساری کەسیرە بووی
 بن گوێسوانەی ماڵە قوڕینەی گوند نشینی داوێن و
 بەر بناری زۆزان و کوێستان دا،
لە لانزارو لیڕەواری چڕ دا،
لە شیو ودۆڵ و لە خڕ دا،
لە سەر ساخ و لووتکەی چیا،
لە ناو مێرگ و جاڕە گیا،
لە ناو ئەشکەوت و بن داران،
 لە ژێر لێزمەو و تاوی باران،
 لە سەر بانیژەی هەر ماڵی،
 لە لانیسار و هەر یاڵێ،
 لەناو بیری قوڵی هەر شیرین خەیاڵێ.
 لەگەڵ کەوبواری بەهاران و خاکەلێوەی
 موژدە هێنی وەرزی ژیانەوە و هەر مان دا،
لە هاوینی پڕ لە تینی خۆری مانگی خەرمانان دا،
لە ناو فەرەنجی شوان و
سەرخەرمانی شەنیاران دا،
لە ناو پۆلی قوتابخانە و
 شێعر و بەستەی شاعیران دا،
لە جێڕۆکی بەر ئاگردانی داپیرە و
 باپیران دا، بۆم بگەڕێن!.
 و دەمدۆزنەوە و دەم ناسنەوە.
دەزانن چیە پێناسەم؟.
من فرمێسکی حەسرەت رێژی قەتس ماوی
 چاوی خوشکی شەهیدێکی کوردستانم!.
من ئاهی دەروونی دایکێکی رۆڵە کوژراوی
 رێگای رزگاری نیشتمانم!.
پێڵوی چاوی لێک نەندراوی
باوکێکی جگەر گۆشە لە دار دراوم!،
 من تاسە و سۆزی دەزگیرانی
 گراو لە باوەش نەگرتووی
 بە بەرگی رەش داپۆشراوم!.
من زەردی رەنگ و باری
 سەر لێوی مناڵانی
لە گەرمی ئامێزی دایک و بابان هەڵبراوم!،
 من پیشمەرگەم!
ماڵم مەتەرێزی شەرەفەو،
 ئەرکم پارێزگاری بست بە بستی کوردستانە،
 لە ناخی ئاخی پیرۆزدا جێم گرتوە و،
 سینەم قەڵغانی وڵاتە و،
 دڵم هەنارە بۆ دیاری.
خۆشەویستم گەلەکەم و ،
 فەرقی نیە گوندی و شاری!،
 گوڵی دیاری دڵدارانم!
من پیشمەرگەی کوردستانم!،
 رێگە دەبڕم بەرەو ئاوات!
١٠ ی خەزەڵوەر پێناسەمەو،
 باوەڕم سازمانی خەبات!
بژین کیژ و کوڕانی کورد،
هەر خەباتە رێگای نەجات!.