دەورەیەکی دیکەی فێرگەی پێشمەرگایەتی سازمانی خەبات کۆتایی پێهات

خەبات مێدیا: دەورەیەکی سەرەتایی پێشمەرگەی تازە پەیوەست بوو بەڕیزەکانی سازمانی خەبات کۆتایی پێهات.
ڕۆژی چوارشەممە ڕێکەوتی 16ی پوشپەڕ، ڕێوڕەسمی کۆتایی هاتنی دەورەی سەرەتایی و چەکدارکردنی پۆلێک پیشمەرگەی تازە پەیوەست بوو، لەژێر چاودێری و بەڕێوەبردنی کۆمیسیۆنەکانی سیاسی نیزامی و پەروەردە و لەژێر ناوی دەورەی شەهید "تاهیر خزری" بەڕێوەچوو.
سەرەتای ڕێوڕەسمەکە بە دەقەیەک بێدەنگی بۆ ڕێزگرتن لە ڕوحی شەهیدان و لەسەروویانەوە جەنابی مامۆستا سەیید جەلال حسینی دامەزرێنەری سازمانی خەبات، دەستی پێکرد، و پاشان چەند وتەیەک لە لایەن بەڕێز کاک کامیل نورانی فەرد بەرپرسی کۆمیسیۆنی پێشمەرگەی سازمانی خەبات پێشکەش کرا کە تێیدا گرینگی خەباتی پێشمەرگانە و دەسکەوت و بایەخی خەباتی چەندین ساڵەی هێزی پێشمەرگە، بەرجەستە کرابوو.
بەرێز نورانیفەرد بەهێنانەوەی وتەیەکی ئەرەستوو لەسەر کۆمەڵگای بەختەوەر کە بە ڕێژەی تاکی سیاسیەکەی مەزندە دەکرێ، پێناسەی هاتن بۆ ناو ڕیزی شۆڕشی کرد و پەیوەستبوون بە ڕیزی پێشمەرگایەتی بە ئەرکێکی ئەخلاقی و نەتەوەیی و مرۆڤانە زانی. ناوبراو لەقسەکانی دا تیشکی خستە سەر دوایین پێشهاتەکانی ئێران و هاتنە سەرکاری ئاخوندی جینایەتکار ڕەئیسی، و بە لەبەرچاو گرتنی ڕەوشی پڕ قەیرانی ئێران، ئەرکی هێزی پێشمەرگەی بە هەستیارتر و گرینگتر زانی و لەئاستی جوڵانەوەش دا لەسەر زەرورەتی پێکەوەبوونێکی هەمەلایەنە و واقعیانە لەسەر ئەساسی ڕێز و خوێندنەوەی بەرانبەر پێداگری کرد.
لەدوای وتەکانی کاک کامیل نورانی فەرد، سرودی من پێشمەرگەم، لە ڵایەن هاوڕێیانی تازە پەیوەست بوو پێشکەش کرا.
پاشان لەلایەن هاوڕێی پێشمەرگە شاهۆ حاتەمی پەیامی سپاس و پێزانین لە مامۆستایانی فێرگە خوێندرایەوە و لە پاشان دا چەکی شەرەف و کەرامەت لەلایەن کادری بەرێوەبەری کۆمیسیۆنی سیاسی نیزامی پێشکەش بە پێشمەرگە تازە پەیوەست بووەکان بەریزی سازمانی خەبات، کرا.