یادی سەروەران

بەرز و بەرێز بێ 10ی خەزەڵوەر رۆژی پێشمەرگەی سازمانی خەبات ی کوردستانی ئێران
پێشمەرگە خۆنەویستەکان!
تێکۆشەرانی رێگەی رزگاری و ئازادی!
لە مێژووی پڕ سەروەری نەتەوەییمان گەلێک رۆژ و بایەخی گرینگ هەن کە سەری نەتەوەکەمانی پێ بەرزە و جێگەی فەخر و شانازیی هەموو تاکێکی دەروەست و بەرپرسیار لە راست چارەنووسی میللەتی ستەم لیکراوی کوردە.
بێ گومان وشەی پێشمەرگە و حەماسەی 10ی خەزەلوەر لەو رۆژە پر لەشانازی و گرینگانەیە کە وەک لاپەرەیێکی دیار و،بەرچاو لە مێژووی خەباتی بێ ووچانی نەتەوەکەمان نەخشیندراوە و تێیدا داستانی کەم وێنەی قارەمانەتی هێزی پێشمەرگە لەبەرانبەر هێزی داپلۆسێنەری رژیمی دیکتاتۆر و دژی کوردی تێدا تۆمار کراوە.
ئەو رۆژە لە دیرۆکی سازمانی خەباتی کوردستان و بە گشتیش لە میژووی خۆراگری و قارەمانەتی هێزی پێشمەگە وەک ئەستێرەیک لە ئاسمانی شەوەزەنگی کوردستان دەدرەوشێتەوە و جێگەی خۆیەتی مێژووی ئەو قارەمانەتیە نەوە لەدوای نەوە بگوازرێتەوە و وەک نمونەیێک بۆ ئازایەتی و نەبەردی و دانایی رێبەری نەمرمان مامۆستا شێخ جەلالی حسێنی بهێندرێتەوە.
لەکاتیدا کە رژیمی جینایەتکاری ئاخوندی دەیهەویست بە هێزێکی یەکجار زۆر لەژێر ناوی هێزی سپای قودس و گاردی جاویدانی رابردوو، لەشاری سەردەشتەوە بەرەو بانە وەرێبکەوێ‌ و بە قەولی خۆیان کۆتایی بە کێشەی کوردستان بێنن، لە نیوان شارەکانی سەردەشت و بانە و لەشوێنێک بە ناوی هەژدەدۆلان دەکەونە بەر هێرشی بەورئاسای هێزی پێشمەرگەی بەرفەرماندەیی مامۆستای نەمر و زیانێکی یەکجار گەورە بە دژمن دەگەینن و هەتا دەروازەی شاری بانە ئەو هیزە کە بە ناوی گاریدی جاویدان دەناسرا بە تەواوی لە لایەن هیزی پێشمەرگەوە تێک شکێندرا و بەداخەوە لەو حەماسە کەم وێنەیە دا 8 رۆڵەی پاک و خونەویستی کوردستان تێکەڵ بە کاروانی شەهیدان بوو.
زەربەکە بە رادەیێک گەورە و چاوەروان نەکراو بوو کە دژمنی لە مەیدانی سیاسی ناچار بە دژکردەوە کرد و لە هەلوێستیکدا خومەینی رایگەیاند کە (خەلکی کوردستان من دەنگی ئێوەم بیست) و داماوانە داوای ئاگربڕی لە خەڵکی کوردستان کرد.
هێزیک بەو گەورەیی و پرچەکیە لەبەرانبەر ئیرادەی پۆلایین و باوەر و ئیمانی هێزی پێشمەرگە شکستی پێهات و ئەو وانە گەورەیەی بو هەمیشە تۆمار کرد کە باوەر و ئیرادە و لەسەر حەق بوون ئەو پاڵنەرانەن کە مەحاڵ دەکەنە مومکین و شانازیی مەزن دەخولقێنن.
ئەو رۆژە سەلمێندرا کە پێشمەرگە رەمزی مانەوەی نەتەوەی کوردە و دەتوانێ‌ بە کەمترین ئیمکاناتەوە بەرەنگاری دژمنی تا سەر ئیسقان تەیار بە ئامرازی سەرکوووت و لەناوبردن ببێتەوە و لەقامۆسی خۆراگری نەتەوەکەمان ئالای سەرفرازیی بە شکاوەیی بهێلدریتەوە.
ئەوەی جێگەی خۆشحالیە ئەمرۆکە ئیتر بازنەی پێشمەرگە لە پێناسە باوەکەی زیاتر پەلی هاویشتووە و وای کردووە هەموو هەلوەداێکی ئازادی و سەربەستی خۆی بە پێشمەرگە بزانێ‌ و لە راست تێکۆشانی گشتی دا خۆی بە بەرپرسیار بزانێ‌ و هێز و پوتانسیلەکانی خەبات بەسەر هەموو بەشەکان دابەش بکرێت.
پێشمەرگە قارەمانەکان!
لەکاتێکدا رێز لە رۆژی پێشمەرگە دەگرین کە رژیمی تاریکی و نەزانی ئاخوندی لەو پەری قەیران و کێشە دایە و هەموو ئەو فشارانە وای کردووە ترسی دەسەلات لەمانەوە حوکمی رۆژ بە رۆژ زیاد بکات و هەرەشە یەک لەدوای یەکەکانی مۆرەکانی ئاخوندانی تاران بەڵگەی پشت راست کردنەوەی ئەو راستیەن و هاوکات دەرخەری کاریگەری خەبات و تێکۆشانی هەمەلایەنەی پێشمەرگە و گەلی خۆراگری کورد لە کوردستانی ئێرانن. بەو پێیە ئەو دۆخە نوێیە هەستی بەرپرسیارەتی و وریابوونی زیاترمان لێ دەخوازێ‌ و پێویستە بەتەبایی و یەکریزی نەتەوەیی بۆ هەر چەشنە ئالوگۆرێک بە قازانجی مییلەتەکەمان ئامادە بین.هەموو روداوەکان ئەو راستیەمان وەبیر دێنەوە کە دواجار ئەوە یەکریزی و تەبایی ناوخۆییمانە کە دەتوانێ‌ زامنی سەرکەوتن و دەستبەر کردنی مافەکانمان بێ.
لەو یادە پیرۆزە دا پیرۆزبایی لەسەرجەم بنەماڵەی سەربەرزی شەهیدان و زیندانیانی سیاسی و بنەماڵەی سەرفرازی پێشمەرگە و سەرجەم هێزی پێشمەرگە بە هەر بیروباوەرێک و کۆمەلانی خەڵکی کوردستان دەکەین و ئومێد دەکەین لەسەر تێکۆشانی پڕ ئیرادە و باوەری هێزی پێشمەرگە شاهیدی دەستبەر بوونی مافە رەواکانی نەتەوەکەمان بین و دەسەڵاتی ئاخوندی بروخێ‌ و حکوومەتێکی خەڵکی و پارلەمانی و دیموکراتیک لە کوردستان وەدی بێ.
بروخی رژیمی دیکتاتۆری ئاخوندی
ئازاد و ئاوەدان بێ کوردستان
سازمانی خەبات ی کوردستانی ئێران
کومیتەی ناوەندی
10ی خەزەڵوەری 1400