سازمانی خه‌باتی کوردستانی ئێران
خەبات مێدیا: ڕێکخراوی ڕاپۆرتدەرانی بێ سنوور، لە نوێترین ڕاپۆرتی ساڵانەی خۆیدا لە بواری ئازادی مێدیا لە ساڵی 2022 ڕایگەیاند: لە نێوان 180 وڵات، ئێران لە پلەی 178دایە.
هەروەها کۆریای باکوور و ئێریترە دوو پلەی خوارەوی ئێرانن. وڵاتی چین دووپلە سەرتر لە ئێران و لە پلەی 175دایە.
ئەمە لە کاتێکدایە کە لەچاو ساڵی ڕابردوو پلەی ئێران چوارژمارە دابەزیوە و ساڵی ڕابردوو لە پلەی 174ی ئەم ڕیزبەندییەدا بووە.
سانسۆر، کونترۆڵی دەوڵەت لەسەر مێدیاکان، بچڕانی هێڵی ئینتەرنێت و فیلتەر، توندوتیژی لە دژی ڕۆژنامەنووسان و زیندانی و کوشتنی مێدیاکاران، داخستنی مێدیاکان لەو پێوەرانەیە کە جێگەوپێگەی هەروڵاتێک لەم لیستەدا دیاری دەکات.
بە پێی ڕاپۆرتی ڕێکخراوی ڕاپۆرتدەرانی بێ سنوور، لە ساڵی 1357 تائێستە لانی کەم 860 ڕۆژنامە نووس و شاروەند ڕۆژنامەنووس گیراون، لەبەندکراون و لەسێدارە دراون.
لە ئێستادا 34 ڕۆژنامەنووس لە بەندیخانەکانی ئێران دان و ئەمە بۆتە هۆی ئەوەیکە ئێران ببێتە یەکێک لە گەورەترین بەندیخانەکان بۆ ڕۆژنامەوانان.
ڕژیمی ئێران، سەرەڕای سەرکوتی مێدیاکان، لە ساڵانی ڕابردوودا هەوڵی داوە تا زۆرتر زاڵ بێ بەسەر تۆڕەکۆمەڵایەتییەکان و ئینتەرنێت و هەروەها کرانەوەی کاناڵی نەتەوەیی ئیتڵاعات و هەروەها دەیهەوێ کونترۆڵی ئینتەرنێت بخاتە ژێردەستی هێزی نیزامی.
هەر بە پێی ئەم پیلانەی ڕژیم، گەڵاڵەی صیانت" ڕەوانەی مەجلیسی بەناو شۆرای ئیسلامی کراوە و بە پێی ئەم گەڵاڵەیە تۆڕەکۆمەڵاتییە دەرەکییەکان وەکوو ئیسنتاگرام بەشێوەی جیدی سنووردار دەکرێن. پێشتر تۆڕی کۆمەڵایەتی دیکە وەکوو فەیسبووک، تووییتەر، یوتیوب و هەروەها تێلگرام فیلتەر کراون.
شایانی ئاماژەیە، لەم ڕاپۆرتەدا کە بە بۆنەی 3ی مانگی مەی ڕۆژی جیهانی ئازادی مێدیا بڵاوکراوەتەوە، وڵاتی نۆرویژ وەکوو پێنج ساڵی ڕابردوو یەکەم وڵاتە و دانمارک و سوید پلەی دووهەم و سێهەمیان هەیە.
