سازمانی خه‌باتی کوردستانی ئێران
ڕۆژی چوارشەممە ٢٠ ی خەزەڵوەر، دیپلۆماتکارانی ئەورووپا باسیان لە ڕێکەوتنی وڵاتانی ئەندامی یەکێتی ئوروپا بۆ ئابڵوقە خستنەسەر بەرپرسانی ڕژیمی ئاخوندی ئێران بە هۆی "سەرکوتکردنی دڕندانە"ی راپەرینەکان دژی کوژرانی ژینا (مەهسا) ئەمینی، کرد. بڕیارە ڕۆژی دووشەممەی داهاتوو لە کۆبوونەوەی وەزیرانی دەرەوەی وڵاتانی ئەندام لەو یەکیەتیە، پەسەند بکرێت.
بەپێی لێدوانی چوار دیپلۆماتکاری ئەوروپی رێککەوتنێک لەسەر چوارچێوە و وردەکاری سزاکان کراوە و دوای پەسەندکردنی ئەو سزایانە لە کۆبوونەوەی داهاتووی وەزیرانی دەرەوەی وڵاتانی ئەندام، کاری پێ دەکرێن.
ئورسولا ڤۆن دێرلاین، سەرۆکی کۆمیسیۆنی ئەوروپا پێش راگەیاندنی ئەم هەواڵە وتبووی: کاتی ئەوە هاتووە سزای ئەوانە بدرێ کە بەرپرسن لە سەرکوتی ژنان لە ئێران. ئەم سەرکوتکردنە دڕندانە و هەژێنەرەو نابێت بێ وەڵام بمێنێتەوە.
لە چەند رۆژی رابردوودا، وەڵاتانی ئەمریکا، بەریتانیا و کەنەدا بە جیا گەمارۆیان خستبووە سەر "پۆلیسی ئاسایشی ئەخلاق"ی هێزی ئینتزامی ناسراو بە "گەشتی ئیرشاد" و ژمارەیەک لە بەرپرسان و یەکەکانی ئەمنی و ئینتیزامی رژیمی ئێران.
ژینا (مەهسا) ئەمینی ۲۲ ساڵەی خەڵکی شاری سەقز کە لەگەڵ بنەماڵەکەی بۆ سەردانی خزمەکانی لە تاران کردبوو، دوای ئەوەی لەلایەن هێزەکانی گەشتی ئیرشاد دەستبەسەر کرا و گوازرایەوە بۆ زیندانی پۆلیسی ئاسایشی ئەخلاق لە شەقامی وەزرای تاران، توشی مەرگی مەغز بوو.
ڕۆژی ٢٥ی خەرمانان میدیاکانی رژیمی ئێران هەواڵی کۆچی دوایی ناوبراویان ڕاگەیاند. لەو کاتەوە شارە جیاجیاکانی ئێران گۆڕەپانی ناڕەزایەتی جەماوەرە.
حەوتووی پێشوو چوونی زیاتر لە 10 هەزار فەرماندە و ئەفسەری سوپای پاسداران کە لە ناوەند و دامەزراوە ئینتزامی و ئەمنیەتیەکاندا دەوریان لە سەرکوتی راپەریوان هەبووە، قەدەغە کرد.
پەرلەمانی ئەوروپا حەوتووی رابردوو لە بریارنامەیەکدا داوای لە وەڵاتانی ئەندام کرد، سزای فەرماندە و بەرپرسانی هێزی ئینتیزامی و ئەمنیەتیەکانی رژیمی ئێران، بەتایبەت ئەوانەی پەیوەندییان بە گەشتی ئیرشادەوە هەیە، سەردانی ئوروپایان لێ قەدەغە بکەن و دەست بە سەر سەرمایەکانیاندا بگرن.
