سازمانی خه‌باتی کوردستانی ئێران
ماردین زاهدی
لە سەرانسەری دونیا دەگمەنن ئەوانەی کە دەنگی شۆڕشی ژینا یان نەبیستبت. ئەو شۆڕشەی کە بەهۆی شەهیدکرانی نارەوای کچە کوردێکی ۲۲ ساڵان بە ناوی ژینا ئەمینی بە دەستی حکومەتی تاریکپەرەست و دڵ پڕ لە قین، سەری هەڵدا و جیهانی هەژاند.
شۆڕشی ژینا بە دروشمی ژن ژیان ئازادیی و بە پێشەنگایەتی ئافرەتانی بوێر و لاوانی تێکۆش و بێزار لە ستەم، بە مەبەستی روخانی دەسەڵاتی جەهل و جینایەت لە ئێرانی ئاخوند لێدراو، بۆ ئامانجی هێنانەدیی ماف و ئازادیەکان بۆ نەتەوە بندەستەکان، مافی یەکسان و بەرابەر بۆ ئافرەتان، بۆ سڕینەوەی هەموو جۆرە هەڵاواردن و جیاکاریەک لە ئێران لە کوردستانەوە چەخماخەی لێدرا و هەر زوو سەرانسەری ئێرانی گرتەوە.
دیمەنەکانی شۆرشی ژینا ئەوندە حەماسە خولقێنن و بوێری و چاونەترسی ژنان و لاوان نیشاندەدا کە دۆخی رژیمیان قورس و حەستەم کردووە بەجۆرێک کە لە 40 ساڵی رابردوودا ئەو دەسەڵاتە بەو رێژەیە لاواز و بێ توانا و لە روخان نزیک نەبووە. دروشمەکانی شۆرشی ژینا لە هەموو ئێران بووەتە وێردی سەر زمانی هەر لە منداڵی قوتابخانە بگرە هەتا خوێندکاری زانستگا و بازاری و تێکڕای چین و توێژەکانی کۆمەڵەگەی ئێران.
شۆڕشی ژینا توانی شکست بە سیاسەتی دووبەرەکێ ی رژیم لە نێوان نەتەوەکانی ئێران، بێنێ و ئەو نەتەوانە دەست لەنێو دەستی یەکتر پشتیوانی لە یەکتر دەکەن و هەموو بە یەک دەنگ هاواری مەرگ بۆ خامنەیی و ژن ژیان ئازادی سەر دەدەن.
لە دوای 50 رۆژ لە سەرهەڵدانی شۆرشی ژینا، دەبینین کە هەموو نەتەوەکانی ئێران بریندارن و خوێنیان لێ دەچۆڕێ، بەڵام ئەم شۆرشە هەر چۆن لە کوردستان کڵپەی کرد، هەر ئاوایش بووتە هەوێنی بەردەوامی و بەربڵاوبوونەوەی لە هەموو کون و قوژبنێکی وەڵات. وەک بڵێی کوردستان پێشەنگایەتی و پێشرەوی خەباتی ئازادیخوازی بە باڵا دووراوە، رۆژگارێک سەنگەری ئازادی ئێران بوو و لە هەموو ئازادیخوازێکی ئێرانی بۆ ئەوەی بەرپەرچی زوڵم و ستەمی ئاخوندان بداتەوە خۆی دەگەیاندە کوردستان، ئەمرۆیش کوڕان و کچانی کوردەواری مەشخەڵداری شۆرشی ژینان و بڕیاری روخان و لەناوچوونی دەسەڵاتی نەگریس و دواکەوتووی ئاخوندانیان داوەو باقی نەتەوە و پێکهاتەکانی ئێرانیش هەنگاو بە هەنگاو لەگەڵی دەرۆن و پشتیوانی لێ دەکەن.
شۆرشی ژینا رێگەیەکی باشی بڕیوە و کچان و کوڕانی بوێر و تێکۆشەری کوردستان و ئێران بە پێداگری و رادیکاڵتر کردنی دروشمەکان دژ بە دەسەڵاتی ئاخوندی، هەتا دێ ئاگری کورەی ئەم خەبات و بەرخۆدانە زیاتر خۆش دەکەن و هێماکان ئەوەمان پێ دەڵێن کە سەرکەوتن زۆر نزیکە و بەم زوانە خۆری ئازادی کورد و نەتەوەکانی دیکەی ئێران لە کەل هەڵدێ. ئەو کاتە ژنان بە مافەکانی خۆیان دەگەن، ژیان دەچێتەوە سەر شاڕێی خۆی و گەلانی ستەم دیتووی ئەو وەڵاتەیش بە ئازادی و بەختەوەری دەژین.
