سازمانی خه‌باتی کوردستانی ئێران
هاونیشتمانیانی مەسیحی لە کوردستان و ئێران!
خاوەن باوەڕانی ئایینی مەسیح لە سەرانسەری جیهان!
بە بۆنەی یادی لە دایک بوونی حەزرەتی عیسا مەسیح(علیەالسلام) و ساڵی نوی زایینی گەرمترین پیرۆزبایی خۆم و تێکڕای هاوباوەڕانم لە سازمانی خەبات ی کوردستانی ئێران بە خاوەن باوەڕانی ئایینی مەسیح لە ئێران،کوردستان و سەرانسەری جیهان پێشکەش دەکەم.
لە کاتێکدا یادی لە دایک بوونی حەزرەتی عیسا (علیە السلام) بەرز ڕادەگرین کە گەلانی ئێران و تێکڕای خاوەن باوەڕن بە ئایینە جیاجیاکان و ئایینی مەسیح لە ئێران و کوردستان دا، لە ژێر قورس ترین ستەم و بێدادی دەسەڵاتی ئاخوندی دەچەوسێنەوە.
بە ئامانجی ڕوخاندنی دەسەڵاتی دیکتاتۆری و کۆتایی هێنان بەو جینایەت و چەوسانەوە،جەماوەری ستەملێکراو لە کوردستان و سەرانسەری ئێران لە ڕاپەڕین و مانگرتندان و ماوەی ١٠ ٠ سەد ڕۆژە شۆڕشێکی بە شکۆ و ڕەوا بەردەوامە.
بەرخودان و شۆڕشی ژن ژیان ئازادی (شۆڕشی ژینا)، لە مێژووی سەرهەڵدان و ڕاپەڕینی گەلانی ئێران دژ بە ستەم و جینایەتکاریی لە نەوعی خۆیدا کەم وێنە بووە، کە بە داخەوە تائێستا زیاتر لە ٦٠ ٠ کەس لە تێکۆشەران و خەباتکارانی کوردستان و ئێران تێیدا شەهید کراون و هەزاران کەس لە زیندان و چاڵە ڕەشەکانی دەسەڵاتی ئاخوندی دا، لە ژێر شکەنجەدان و ئازار دەدرێن.
هاونیشتمانیانی تێکۆشەر!
ئاشکرایە ئاخوندانی دەسەڵاتدار و دیکتاتۆر لە ئێراندا، هەموو هەوڵێک دەدەن کۆتایی بە ڕاپەڕین و شۆڕشی گەلانی وەزاڵە هاتووی ئێران بێنن، بەڵام نەک نەیانتوانیوە کە بەو ئامانجەیان بگەن، بەڵکو بە هۆی سەرکوت و چەوسانەوەی زیاترو شەهید کردنی کچان و کوڕانی قارەمان، جەماوەر بەهێزو یەکگرتووتر لە بەرانبەر سەرکوتگەران دەوێستێتەوە و بۆ ڕوخانی ئەو دەسەڵاتە دواکەوتو و دژی ئینسانیە شێلگیرو تێکۆشەرتر دەبن.
لە یادی لە دایک بوونی عیسا مەسیح و، بە بۆنەی هاتنی ساڵی نوێ ٢٠ ٢٣ی زایینی، سەره‌‌‌خۆشی لە خانەوادەی شەهیدانی ڕاپەڕینی سەد ڕۆژی ڕابردوو دەکەم و دڵنیام دەسەڵاتی دیکتاتۆری ئاخوندی لە ناو دەچێ و هاونیشتمانیانی مەسیحی لەکوردستان و ئێران لە گەڵ تێکڕای جەماوەری ئێران و کوردستان بە ئازادی شاد دەبن و بە ئاوات و ئامانجەکانیان دەگەن.
بڕوخێ ڕژیمی دیکتاتۆری ئاخوندی
سەرکەوێ شۆڕشی ڕەوای گەلانی ئێران
سازمانی خەبات ی کوردستانی ئێران
سکرتێری گشتی بابەشێخ حوسەینی
۲٤ی دیسامبری ۲۰۲۲
۳ی بەفرانباری ۱٤۰۱کۆچی خۆری
