سازمانی خه‌باتی کوردستانی ئێران
خەباتمێدیا: ناوەندی مافی مرۆڤی ئێران, بە بڵاو کردنی ڕاپۆرتێک هەواڵی لەوەدا کە حەسەن فیروزی و محەممەد ئیختیاریان, کە لە ڕەوتی ڕاپەڕینە سەرتاسەرییەکان گیرا بوون, بە هۆی شکەنجەی هێزە ئەمنیە سەرکوتگەرەکانی دەسەڵاتی ئاخوندی ئێران تووشی خوێنبەربوون و دۆخی خراپی تەندروستی بوون و لە ئێستادا لە کۆمادان.
لەم دواییەنەدا فایلێکی دەنگی حەسەن فیروزی, لە تۆڕەکۆمەڵایەتییەکان بڵاو بووەتەوە کە تێدا ناوبراو بە ئاماژەدان بەوەی کە هێزە ئەمنیە سەرکوتگەرەکان لە ژوورەکانی ئیتلاعات بۆ دانپێنانی زۆری شکەنجەی دەکەن, وتوویەتی کە ماندووم لە شکەنجەو لێکۆڵینەوەکانی ئەم بەکرێگراوانە. ئەگەر دەتانهەوێ لەسێدارەم بدەن کێشەم نییە, چوونکە گەورەترین شکەنجە بۆ من نەبینینی کچەکەمە. ناوبراو وتوویەتی پاش ۱۰ساڵ گەیشتمە ئاواتی خۆم و بووم بە خاوەن منداڵێک کە تەنیا ۱۸ ڕۆژ بینیومەو ئێستا تەنیا ئاواتم ئەوەیە پێش مردنم جارێکی دیکە بیبینم.
عەلی ئۆمیدی پارێزەری ناوبراو, شەممە ۱ی بەفرانبار لە ستۆرییەکی ئینستاگرامەکەیدا ڕایگەیاند کە حەسەن فیروزی بەبۆنەی سەختی برینەکانی لە ئێستادا لە کۆمادایە.
