سازمانی خه‌باتی کوردستانی ئێران
خەباتمێدیا: مەسعوود شکاری; باوکی موحسین شکاری ڕایگەیاند، بۆ جاری دووەم کەسێک یان کەسانێکی نەناسراو بەردی گوڵگۆی کوڕە لەسێدارەدراوەکەیان شکاندووە.
ناوبراو لە تویتەرەکەی خۆی نووسیویەتی: من و خێزانەکەم دوای لەدەستدانی کەسە خۆشەویستەکەمان نەگەڕاینەوە و ناگەڕێینەوە بۆ ژیانی ئاسایی خۆمان,ئێستا ئێمە تووشی دەرد کراوین و دەسووتین, بەڵام هێندێک کەس لەوە تێناگەن! وەک ئەمڕۆ کە زیانیان بە بەردی گوڵگۆی کوڕە ئازیزەکەمان گەیاند. مرۆڤ نازانێت چی بەو جۆرە کەسانە بڵێت.
موحسین شکاری، ڕاپەڕیوێکی تەمەن ٢٣ ساڵ بوو کە لە ٣ی ڕەزبەری ساڵی ١٤٠ ١ لە کاتی خۆپیشاندانی شەقامی سەتارخان لە تاران گیریا و دوای دادگاییکردنێکی کورت; بەبێ ڕەچاوکردنی کەمترین ستانداردی ڕێکارەکان سزای لەسێدارەدانی بەسەردا سەپێندرا. ناوبراو بەرەبەیانی ١٧ی سەرماوەز، حوکمی لەسێدارەدانی جێبەجێ کرا، ئەمەش کاردانەوەی زۆری لە ئێران و جیهاندا بەدوای خۆیدا هێنا.
