سازمانی خه‌باتی کوردستانی ئێران
عەلی بەهرامی
لە مانگی پووشپەڕی ١٤٠ ٢ی هەتاوی کۆنگرەی حەوتەمی سازمانی خەباتی کوردستانی ئێران لە هەرێمی کوردستان بەرێوەچوو. ئه‌‌‌گه‌‌‌رچی بەستنی کۆنگرە یان هەر جۆرە کونفرانس و کۆڕ و کۆبوونەوەیەکی سیاسی بۆ سازمان و حیزبێکی چالاک و تێکۆشەر کاریگەری باش و ئەرێنی هەیە، ئەو خاڵە ئەرێنی و باشانەی کۆنگرەی حەوتەمی سازمانی خەبات لەم قۆناغەدا گەلێک به‌‌‌رچاو و گرنگ بوو.
لە ئێستادا کە ناوچەکە و بەتایبەت هەرێمی کوردستان لە بەردەم کێشە و ئالەنگاری جیاجیای دەرەکی و ناوخۆییدایە و ئەو کێشە و ئالەنگاریانە بەشی زۆری لەلایەن رژیمی ئێرانەوە ساز دەکرێ و رژیم جوێ لەوەی بەدوای پەکخستن و لەباربردنی ئەزموونی هەرێمی کوردستانی عێراقە، فشار و زەختێکی زۆریش دەکات بۆ سنووردار کردن و پەلوپۆ کردنی بزوتنەوەی کورد لە کوردستانی ئێران. ئەوەیش ترس و نادڵنیایی لای بەشێک لە تێکۆشەرانی کورد لە ناو و دەرەوەی کوردستان دروست کردوە. رژیم بەو هەنگاوە لەرزۆکانەی بەتایبەت لەدوای شۆڕشی ژینا، دەیەوێ وا نیشان بدا کە هێز و توانای ماوەو دەتوانێ لە دەرەوەی سنوورەکانیش بەرپەرچی دژمنەکانی بداتەوە. بەڵام بە خوێندنەوە بۆ دۆخ و قەیرانەکانی ناوخۆی ئێران و پێکهاتەی دەسەڵات، دەبینین رژیم نەک توانای چارەسەری قەیرانە ئابووری و کۆمەڵایەتی و ژینگەیی و سیاسیەکانی نیە، بەڵکوو گەندەڵی و فەسادی بەرێوەبەری و ململانێی نێو باندەکانی دەسەڵات هەتا دێ زیاتر دەبێ. بۆیە ڕاپەڕین و شۆڕشی سەرتاسەری لە ئێران یەکێک له چاوەڕوانیە بەهێزەکانە. ئەوەیش کە رژیم هێز و توانای خستۆتەگەڕ لە عێراق و هەرێم دەگەڕێتەوە بۆ دەور و کاریگەری بزوتنەوەی کوردستان و بزوتنەوەی ئازادیخوازی لە ئێران بۆ یەکخستنی چین و وتووێژەکانی کۆمەڵگەی ئێران و رێبەریی کردنی شۆڕشی ژینا و قڵپ کردنەوەی وەزعەکە بەسەر رژیمداو توانیان ئەو دەسەڵاتە هەتا لێواری ڕوخان بەرن.
لەوەها کاتێکی حەساسدا کە رژیم کەوتۆتە پەلەپڕوزێ و هێز و توانای خۆی بۆ لێدان و بەرەوڕووبوونەوەی بزوتنەوەی کوردستان و بزوتنەوەی ئازادیخوازی لە ئێران خستووەتە کار، ئەرکی چالاکان و شۆڕشگێڕانە کە بە لێبڕاوی بۆ بەرپەرچدانەوەی پیلانەکانی رژیم و رەواندنەوەی تەمی ترس و دڵەڕاوکێ هەنگاو هەڵگرن و رێگە نەدەن رژیم چۆنی بوێ یاری بە چارەنووسی به نەتەوەی کورد و شۆڕشەکەی بکات و بە حیسابی خۆی ئیرادەی کورد و شۆرشگێڕانی بەو هەڕەشە و گوڕەشە و پەلامارانە بشکێنێ. هەر بۆیە سەرکردایەتی سازمانی خەبات بەهەست کردن بە مەسئولیەتی مێژوویی و شۆڕشگێڕانە و لێکدانەوەی کۆسپ و تەگەرەکانی، بە ئیرادە و باوەڕێکی قاییم بڕیاری لە گرتنی کۆنگرەدا و بۆ ئەبدەیتکردنەوە و پێداچوونەوە بە بەرنامە و سیاسیەت، قەوارە و بەشەکانی تەشکیلات، هەڵبژاردنی سەرکردایەتیەکی نوێ و بەتوانا و خۆسازدانەوە و ئامادەکاری بۆ ئەگەرەکانی بەردەم و بەتایبەت بە خوێندنەوەی زیاتر بۆ شۆرش و ڕاپەڕینەکانی ناوخۆی کوردستان و ئێران، کۆنگرەی حەوتەمیان، (کۆنگره‌‌‌ی شۆڕشی ژینا) وەکوو زەروورەتێک بۆ ئەم قۆناغە سەرکەوتووانە، بەڕێوەبرد.
