سازمانی خه‌باتی کوردستانی ئێران
ساڵی ١٩٧٩ زایینی بەرانبەر بە ١٣٥٧ ی خۆری لە گەڵ جۆڵەی بەربڵاوی خەڵکی ئێران لە شەقامەکاندا بۆ دەربڕینی نارەزایەتی و بناژۆکردنی سیستەمی گەندەڵی پاشایەتی، هەوڵەکانی جەماوەری کوردستانیش بۆ گەیشتن بە ئازادی و مافەکانی مرۆڤ لە لایەن حیزب و لایەن و کەسایەتی سیاسیەکاندا لە راگەیاندنەکانی ئەو کات دەگەیشتە گوێی خەڵک و حکومەتەکانی جیهان. داخوازی ڕەوای خەڵک لە قۆناغێکدا تەنیا رزگاری و بناژۆکردنی دەسەڵاتی ستەمکاری پاشایەتی بوو... بەڵام دروشمەکان پیشڕەوتر لە دەنگی شەقام بوو... ووتەی رۆژنامەکان رەنگین تر لە روخسارەکان بوو و داخوازیەکانیش بە چەندها پلە، لە داخوازی تاک و کۆمەڵگا بەرەوسەرتر بوو... ئەوەی دەبینرا شەقامێکی تەواو ڕۆشنبیرانە نەبوو، بەڵکوو مانشێتێکی پێشڕەوانە بوو، ئاڵایەکی ڕەنگین کە بەدەست هەوێنی بیری ئەو کۆمەڵگایە وە دەشەکاوە...
هەوێنێک کە لە حوجرە و زانکۆکان بۆ بەرپرسایەتیەکی پیرۆز ڕچەی سەختی خەباتی هەڵبژاردبوو.
ڕاستی ڕووداوەکانی شۆڕشی ساڵی ١٣٥٧ تا ١٣٥٩ لە کوردستان ئەوە بوو کە کەسانی لێهاتوو، سیاسەتوان، زانا و تێکۆشەر کە پێگەیەکی کۆمەڵایەتی و ئایینی و سیاسیان لەناو خەڵکدا بوو، لە پێشەوەی جەماوەر وەڕێ کەوتبوون، دەرکەوتبوون، چالاک بوون و گیان لەسەر دەست و بە بێ سڵ کردنەوە لە سامی ستەمگەر، پشت لە هەموو بەرژەوەندییەکانی تاکخوازانە و دنیایی، بە ڕاشکاوی خواستی سەرەکەی ئینسانی و نەتەوەییان دەووت و پێداگریان لەسەر دەکرد. خاڵی بەستنەوەی کەسایەتیەکان و خواستی شەقام و کۆمەڵگا بە تایبەت لە کوردستاندا قەوارەیەکی مۆدێرن بوو بە ناوی حیزب. سیاسەتوان و خەباتکاری کورد بە باشی بوونی حیزبیان وەک پێکهاتەیەکی سیاسی و مەدەنی و کۆمەڵایەتی بە پێویست زانیبوو و هەر لە ساڵەکانی دوای شەڕی یەکەمی جیهانی هەوڵیان بۆ دامەزراندنی دابوو... بە بێ بوونی حیزب ئەو هەوڵانەی بۆ وەدەست هێنانی ئازادی و مافەکانی ئینسانی دەدرێت، تەنانەت تۆماریش ناکرێت... حیزبی کوردی بە هەموو کەم و کوڕی و هەڵە و گرفتەکانیەوە هەتا ئێستاش قەوارەیەکی سیاسی و خەباتکارانەی بێ جێگرەوەیە.
هەرچەند لە وڵاتانی دیکتاتۆر و داخراودا بەر بە هەموو کۆگا و دامەزراوە و سازمانێکی کۆمەڵایەتی دەگیرێت مەگەر ئەوەی لە ژێر سێبەر و چاوەدێری ئەو رژیمانە دا بن، بۆیە رژیمی تاران هەتا ئێستاش نەیتوانیوە هیچ قەواریەکی ئۆپۆزسیۆنی کوردستان بخاتە ژیر رکێفی خۆی یان مەجبووری بکات خواست و یاسا و رێساکانی قەبووڵ بکەن.
کورتەی باسەکە ئەوەیە کە بە شێوەیەکی تایبەت حیزبی کوردی رۆژهەڵاتی کوردستان هیچ کاتێک لە ناوبازنەی دەسەڵاتی سیستەمەکانی سیاسی و حکومەتی ناوەند دا نەبوون و هەمیشە رۆڵی خۆیان وەک خەباتکار و نەیاری دەسەڵاتی ناوەندی و ڕەخنەگری دەسەڵات پاراستووە... لە کاتی ڕووخاندنی سیستەمی پاشایەتیدا ڕێبەر و ووتەبێژی کۆمەڵگا و شەقام بوون و داخوازی و داواکاری ڕەوای جەماوەریان بە راگەیاندن و میتینگ و دانیشتنەکان بڵاوکردۆتەوە و دوای دامەزرانی حکومەتی نوێش ڕێگای خەباتیان درێژە پیداوە
حیزبی کوردی بێجگە لەوەی پێکهاتەیەکی سیاسی و موبارزاتی بووە، میدیای جەماوەری و تریبوونی خواست و ئێرادەی چین و توێژەکانیش بووە. بۆیە خەڵکی کوردستان و بەتایبەت لاوان و ئافرەتان و بیر جیاوازان پێگەی ئەندامیەتی حیزبی کوردیان بۆ گەیشتن بە خواستە ڕەواکانی خۆیان و بەرە و جەمارەکەیان هەڵبژاردووە. حیزبێک کە لەناوخۆیدا ڕێک بوون و پێکەوە بوون و پێکەوە ژیان فێردەکات و لەدەرەوش خەبات و سیاسەت و راگەیاندن بەڕێوەدەبات.
۵ ی خەرمانان ساڵرۆژی دامەزراندنی قەوارەیەکی بەهێزی سیاسی و خەباتکاری و نەتەوەییی کورد ، ساڵرۆژی هاتنە دی خەونی بەرەی کۆن و نوێ و ساڵڕۆژی دامەزرانی حیزبێکی سیاسی کوردستان لە ژێر ناو و ئاڵای سازمانی خەباتی کوردستانی ئێران لە هەموو خەڵکی کوردستان و لە جوغرافیا و مێژووی کوردستان پێرۆز بێت.
