سازمانی خه‌باتی کوردستانی ئێران
ئەمڕۆ چوارشەممە ١ی سەرماوەزی ١٤٠٢ی هەتاوی، لە بەیاننامەیەکدا وەزارەتی دەرەوەی قەتەر ئاشکرای کرد، کە بە هاوبەشی لەگەڵ میسر و ئەمەریکا سەرکەوتوو بوون لەنێوجیاوانی بۆ گەیشتن بە ڕێككەوتن لەنێوان ئیسرائیل و حەماس بۆ ئاگربەستی مرۆیی و گۆڕینەوەی دیل و بارمتەکان.
لە ڕاگەیێندراوەكەدا هاتووە، ڕێككەوتنەكە لە قۆناغی یەکەمدا بریتییە لە ئاڵوگۆڕی ٥٠ ژن و منداڵی مەدەنی لە کەرتی غەززە، لە بەرانبەر ئازادکردنی ژمارەیەک ژن و منداڵی فەڵەستینی کە لە زیندانەکانی ئیسرائیلدان.
باس لەوەش كراوە، لە قۆناغی داهاتوودا ژمارەیەکی دیکەی دیل و بارمتەکان ئاڵوگۆڕ دەکرێن.
لە بەشێکی دیکەی بەیاننامەکەدا هاتووە، ئەو ئاگربەستە ڕێگە بە چوونە ژوورەوەی ژمارەیەکی زیاتری کاروانی مرۆیی و هاوکاری فریاگوزاری بۆ کەرتی غەززە دەدات.
پێشتر ڕۆژنامەی واشنتن پۆست بڵاویکرد، ئەو ڕێككەوتنە بە هاوکاریی ئەمەریکا دەکرێت و بەگوێرەی ڕێككەوتنەكە بۆ ماوەی چوار ڕۆژ، ئیسرائیل هێرشەکانی ڕادەگرێت.
