سازمانی خه‌باتی کوردستانی ئێران
هاونیشتمانیانی بەهەڵوێست!
خەڵکی بەشەرەف و خەمخۆری کوردستان!
ئەمڕۆ ۱۰ی ڕێبەندانی ۱۴۰۲ی هەتاوی، جیهان بینەر و شایەتحاڵی خوڵقاندنی حەماسەیەکی دیکە لە ئێوەی بەهەڵوێست و مافخواز بوو کە بە هاوخەمیتان لەگەڵ خانەوادەی شەهیدان; پێژمان فاتیحی، وەفا ئازەربار، موحسین مەزڵوم و محەممەد فەرامەرزی، و بەدەمەوەچوونی بانگەواز بۆ مانگرتنی گشتی، سەلماندتان کە دەسەڵاتی خۆسەپێنی ئاخوندی ئێران، لای هیچ یەک لە چین و توێژە نەتەوەو نیشتمان دۆستەکان هیچ مەشروعیەتێکی نییەو ڕێبازی خەبات دژ بە داگیرکەر و حکومەتی سەرکوتکەری ئاخوندی ڕێگەیەکی ڕەوا و بەرحەقه.
دەسەڵاتدارانی ئاخوندی ئێران پێیان وایە کە دەتوانن بەو کردەوە ترسنۆکانە خەڵکی ئازادیخواز چاوترسێن بکەن، بەڵام خەڵکی کوردستان بە دەیان جار ئەو ڕاستیەیان سەلماندووە کە ڕێگەی خەبات و شەهادەت لەو ڕێگەیەدا شانازیەکی بێکۆتاییەو ئەمڕۆش بینیمان کە باوکی ئەو شەهیدانە، پیرۆزبایی شەهید کرانی ڕۆڵەکانیان لە یەکتر دەکەن و دایکی شەهیدان دەڵێن کە ڕۆڵەکانیان شاخی تەرەغەن و سەر بۆ داگیرکەر دانانەوێنن.
سازمانی خەبات ی کوردستانی ئێران وێڕای سەرەخۆشی دووبارە لە خانەوادەی سەربەرزی شەهیدانی سوورخەڵاتی کوردستان، سپاس و دەسخۆشی خۆی لە خەڵکی بەشەرەف و بە هەڵوێستی کوردستان بۆ بەشداریان لە مانگرتن و هاوخەمی و هاودەردی لەگەڵ خانەوادەی داخداری شەهیدان، ڕادەگەینێت. هیوادارین کە بە درێژەدان بە شۆرش و بەرخۆدان لە ڕێگەی خەبات، بە زووترین کات داگیرکەران لە وڵاتەکەمان وەدەربنین و بە هەڵدانی ئاڵای ئازادی، زامی نیشتمانە بریندارەکەمان ساڕێژ بکەین.
سازمانی خەبات ی کوردستانی ئێران
کومیتەی ناوەندی
۱۰ی بەفرانباری ۱۴۰۲ی هەتاوی
