سازمانی خه‌باتی کوردستانی ئێران
ماڵپەڕی عەرەبی سکای نیوز ڕایگەیاند، سێ ئەندامی گرووپی ترۆریستی حەشدی شەعبی سەر بە ڕژیمی ئاخوندی ئێران لە کاتی هێرشی فڕۆکەی بێفڕۆکەوان لە بەغدا کوژراون.
ئەم هێرشە لە ڕێگەی سێ مووشەکی ڕێنماییكەرەوە بۆ ئۆتۆمبێلێکی سەر بە هێزەکانی حەشدی شەعبی لە ناوچەی ئەلمشتەل لە ڕۆژهەڵاتی پایتەختی عێراق ئەنجام دراوە.
هەندێک لە میدیا عەرەبییەکان ئەم ئۆپەراسیۆنەیان بەستەوە بە هێرشە تۆڵەسەندنەوەکانی ئەمریکا بۆ کوشتنی سێ سەربازی ئەم وڵاتە لە هێرشەکانی ڕۆژانی ڕابردوودا.
بەپێی ڕاپۆرتی سەرچاوە هەواڵیەکان لە تەقینەوەکەی شەوی ڕابردووی بەغدا دوو لە بەرپرسەکانیان کوژراون کە یەکێکیان بەرپرسی چالاکییەکانی دەرەوە بووە، ئەوی دیکەشیان بەرپرسی چەک بووە.
ئەو دوو سەرکردەیەی کەتائیبی حزبوڵڵا کە کوژراون ناویان ئەبوباقر ئەلساعدی و حاجی ئەرکان ئەلعلیاوی-یە.
فەرماندەی ناوەندیی هێزەکانی ئەمریکا-سێنتکام، لەڕاگەیەندراوێکدا بەرپرسیارێتیی هێرشەکەی ئەمشەوی مەشتەلی بەغدای لە ئەستۆ گرت.
لەڕاگەیەندراوەکەدا هاتووە: کاتژمێر ۰۹:۳۰ ئەمشەو، هێرشێکی یەکلایەنەمان کردە سەر کەتیبەکان حزبوڵڵا لە بەغدا، لە هێرشەکەشدا سەرکردەیەکی حیزبوڵڵامان کردە ئامانج کە ڕاستەوخۆ بەرپرسیار بووە لە هێرشەکانی سەر ئەمریکا لە ناوچەکەدا. لە هێرشەكەشدا هیچ هاووڵاتییەكی سڤیل نەکوژراوە.
