سازمانی خه‌باتی کوردستانی ئێران
ڕۆژی سێشەممە ١٥جۆزەردان ۱۴۰۳، نەرگس محەممەدی، براوەی خەڵاتی نۆبێل، داوای لە خەڵک کرد کە بەشداریی کەمپینی یەکگرتوو دژی ئازاردانی جنسی بکەن بۆ دەسپێکردنی گێڕانەوەی گشتی و حوکمدان سەبارەت بە دەستدرێژی جنسی، بەتایبەتی لە زیندانەکانی ڕژیمی ئێران دا.
ئەم چالاکوانە لە پۆستێکیدا لە تۆڕی کۆمەڵایەتیی ئینستاگرام پێداگری لەوە کردەوە دەستدرێژیی جنسی دەتوانرێت وەک ئامرازێکی وێرانکەر لەلایەن هێندێک ڕژێمی دژە خەڵک و زاڵمەوه بەرانبەر بەو کەسانەی ناڕەزیەتی دەردەبڕن بەكاربهێنرێت.
ناوبراو ڕایگەیاند، ئێستا دەستدرێژی و ئازاردانی جنسی ئامرازێکە بۆ شکەنجەدان و دانپێدانان، کە ڕژیم هەوڵدەدات بەو شێوەیە بزووتنەوە ناڕەزایەتیەكان بوستێنی.
٣٦ ژنی زیندانیی سیاسی لە ڕاگەیەندراوێکدا داوایان کردووە، دادگای نەرگس محەممەدی لە ١٩ی جۆزەردان ۱۴۰۳ لە بەردەم خەڵک و بە ئامادەبوونی شایەتحاڵان و گێڕانەوەی ئەو کەسانەی کە دەستدرێژیان کراوەتە سەر و بە ئامادەبوونی میدیای سەربەخۆ بەڕێوە بچێت.
