سازمانی خه‌باتی کوردستانی ئێران
هاوکات لەگەڵ بیستەمین سێشەممەی نا بۆ لەسێدارەدان، کە بە مەبەستی ناڕەزایەتیدەربڕین بە سزای لەسێدارەدانەکان بە دەستی ڕژیمەوە، ژمارەیەک لە بەندکراوانی سەقز و مەشهەد پەیوەستی ئەم هەڵمەتە بوون و مانیان لە خواردن گرت.
بەپێی زانیارییە بڵاوکراوەکان، بەندکراوانی بەندیخانەکانی ئێڤین، قزڵحەسار، کەرەج، خوڕەماوا، مەشهەد، سەقز، خۆی و نەغەدە لە درێژەی بەڕێووەچوونی مانگرتنەکانی سێشەممەی نا بۆ لەسێدارەدان، بۆ بیستەمین حەوتوو، مانیان لە خواردن گرت.
ئەم بەندکراوانە بە بڵاوکردنەوەی بەیاننامەیەک ڕایانگەیاندووە کە ڕژیمی ئێران لە حەوتووی ڕابردوو دا لانیکەم ٨ کەسی لە سێدارە دا و بە دەرکردنی سزای لەسێدارەدان بۆ مامۆستا محەممەد خزرنژاد کە تەنیا بەرگریی لە بزووتنەوەی ڕەوای خەڵک لە ساڵی ١٤٠١دا کردبوو، سەلماندی کە لە هیچ دۆخێکدا دەست لە سەپاندن و جێبەجێکردنی سزای لەسێدارەدان هەڵناگرێ.
لە بەیاننامەكەدا هاتووە کە ڕژیم تەنانەت لە کاتی "شانۆی هەڵبژاردنەکان"دا وازی لەسەرکوت و لەسێدارەدان نەهێناوە.
