سازمانی خه‌باتی کوردستانی ئێران
بەگوێرەی میدیاکانی ناوخۆی وڵات، لە ماوەی دوو ساڵی ڕابردوودا لانیکەم ٢١ پارێزەر لە ئێران لە پێوەندی لەگەڵ پیشەی پارێزەری ترۆر کراون، کە لەو رێژەیە شەشیان کوژراون.
بە پێی ئەم ڕاپۆرتانە لە ساڵی ١٤٠١دا چوار حاڵەتی کوشتن و ١٠ حاڵەتی تروری ناسەرکەوتووی پارێزەران ڕوویانداوە و لە ساڵی ١٤٠٢دا دوو حاڵەتی کوشتن و مردنێکی گوماناوی و چوار حاڵەتی ترۆرکردن کە خەسارەتی گیانی نەبووە تۆمارکراون.
ئەمە تاکە ئامارێکە کە خراوەتە بەردەستی میدیاکان و ژمارەی حاڵەتە هاوشێوەکان کە تۆمار نەکراون زۆر زیاترە.
لەم ڕاپۆرتانەدا باس لە یەکێک لە دوایین حاڵەتەکانی ئەو جۆرە ترۆرانە کراوە، کە تیایدا، لە ٧ی خەرمانانی ئەمساڵ، ئەفشین قاسمی، پارێزەر، لە نزیک دەفتەرەکەی لە تاران، لەلایەن کەسانی نەناسراوەوە هێرشی کرایە سەر.
هەروەها لە مانگی خاکەلێوەی ساڵی ڕابردوودا پارێزەرێک بە ناوی مێهدی عەمارلویی لە نەیشابوور کوژرا. بەپێی ئەم ڕاپۆرتە، تۆمەتباری کوشتنەکە یەکێک بووە لە بریکارەکانی پێشووی ناوبراو.
لە رەزبەری ساڵی ١٤٠٢دا، "مەرگی گوماناوی" ڕەحیم سەعیدی، پارێزەر لە ماڵەکەی خۆی لە شاری مەرەند، کەوتە بەر باسی ڕۆژنامەکان و لە هەمان ساڵدا، حامید میر ئەبولقاسمی بە "چەقۆ، قەمە، داس و تەوەر" هێرش کرایە سەر " لە نەوشار و بریندار کرا.
لە مانگی سەرماوەزی ساڵی ١٤٠١ وەحید مێهرادیفەر ئەندامی سەندیکای پارێزەرانی پارێزگای ئەلبۆرز لە لایەن کەسێکی نەناسراوەوە بە چەقۆ بریندار دەبێت و لە مانگی رەشەمەی هەمان ساڵدا هانا زیکری داواکاری گشتی پۆلیسی سەندیکای پارێزەرانی پارێزگای کوردستان تەقەی لێ دەکرێت و بریندار دەبێ.
