سازمانی خه‌باتی کوردستانی ئێران
واشنتۆن هۆشداریی بە حکومەتی عێراق داوە کە ئەگەر ڕێگری لە ئەگەری هێرشی رژیمی ئێران بۆ سەر ئیسرائیل لە خاکی عێراقەوە نەکات، لەوانەیە ئەم وڵاتە ڕووبەڕووی هێرشی تۆڵەسەندنەوە لە لایەن ئیسرائیلەوە بێتەوە.
بەگوێرەی ڕاپۆرتی ئەکسیۆس، دوو بەرپرسی ئەمریکی ڕایانگەیاند کە جەیک سالیوان ڕاوێژکاری ئاسایشی نیشتمانیی کۆشکی سپی و ئەنتۆنی بلینکن وەزیری دەرەوەی ئەمریکا لەو بارەوە لەگەڵ محەممەد شیاع سوودانی سەرۆک وەزیرانی عێراق قسەیان کردووە و هۆشدارییان لە لێکەوتەکانی ئەم کارە داوە.
بەگوێرەی سەرچاوە ئاگادارەکان، بەرپرسانی حکوومەتی بایدن پێداگریان لەوە کردووەتەوە کە ئەگەر عێراق لە خاکەکەیەوە ڕێگری لە ڕژیمی ئێران نەکات هێرش بکاتە سەر ئیسرائیل، ئەمریکا ناتوانێت ڕێگری لە هێرشی ئیسرائیل بۆ سەر عێراق بكات.
هەروەها ئاکسیۆس ڕایگەیاند، سەرۆکوەزیرانی عێراق و ڕاوێژکارەکانی لە لێدوانەكانیاندا ڕایانگەیاندووە کە نایانەوێ لە ململانێکانی نێوان رژیمی ئاخوندی ئێران و ئیسرائیلدا تێوەگلێن.
