سازمانی خه‌باتی کوردستانی ئێران
کتایون ڕیاحی، ئەکتەری سینەمایی کە لە کاتی ڕاپەڕینی “ژن، ژیان، ئازادی”دا بەهۆی یاوەریکردنی خەڵکەوە گیراوبوو، وە دواتر چاڵاکی لی قەدەغەکرا، پشتیوانی لە مانگرتنی سەرتاسەری شۆفێرانی بارهەڵگرەکان کردووە و لە تۆڕی کۆمەڵایەتی ئینستاگرام نووسیویەتی: “بارگرانی شەرەفی ئێران لەسەر شانی شۆفێرانی بارهەڵگرەکانە”. مانگرتنی شۆفێرانی بارهەڵگر لە ئێران پێی ناوەتە شەشەمین ڕۆژی خۆیەوە و لە چەند ڕۆژی ڕابردوودا شۆفێرانی ئۆتۆمبێلی بارهەڵگر لە زیاتر لە 100 شار کارەکانیان وەستاندووە. شۆفێرانی ناڕازی ڕایانگەیاندووە کە مانگرتن دەکەن بۆ ناڕەزایەتی دەربڕین بەرامبەر بە کەمکردنەوەی ڕێژەی گازۆیل و گرانبوونی تێچووی بیمە و کەمی ڕێژەی گواستنەوەی بار و داواکارییەکانی دیکەی سەندیکاکان کە جێبەجێنەکراون. ژمارەیەک شۆفێر ڕووبەڕووی ڕێوشوێنی ئەمنی توندوتیژ و بەندکردن بوونەتەوە.
