سازمانی خه‌باتی کوردستانی ئێران
ئیسرائیل باس لە هۆی تەقینەوەی بەندەر ڕەجایی دەکات
كاناڵی“کان”ی ئیسرائیلی بڵاویکردەوە، ئەو کانتینرانەی لە بەندەری ڕەجایی ئێران تەقیونەتەوە، بەشێک لە زنجیرەی دابینکردن و قاچاخی چەک بۆ گرووپی ترۆریستی حوسییەکانی یەمەن بوون. بەگوێرەی ڕاپۆرتەکە، ئەو کانتینرانە ئەو ماددانەیان تێدا بووە کە لە دروستکردنی سووتەمەنی مووشەکی بالیستیدا بەکارهێنراون کە مەبەست لێی ناردنی بۆ حوسییەکان بووە. سپای ترۆرستی پاسداران لەو بەندەرە بۆ گواستنەوەی چەک بۆ گرووپە ترۆریستییەکانی وەک حیزبوڵڵا و حوسییەکان کەڵکی وەرگرتووە. ڕاپۆرتەکان ئاماژە بەوە دەکەن کە بەندەری ڕەجایی لەم دواییانەدا باری پەركلرۆرات سۆدیۆمی لە چینەوە هێناوە کە پێکهاتەیەکی سەرەکییە لە بەرهەمهێنانی سووتەمەنیی ڕەقی مووشەکی بالیستیك بەكاردێت. حوسییەکانی یەمەن لە ئۆکتۆبەری ٢٠٢٣ەوە هێرشی بەرفراوانیان لە دژی کەشتییەکانی دەریای سوور دەستپێکردووە و لە بەرامبەریشدا ئیسرائیل و هاوپەیمانیی نێودەوڵەتی ئۆپەراسیۆنی سەربازییان لە دژی ئەو گرووپە ئەنجامداوە.
