سازمانی خه‌باتی کوردستانی ئێران
عەباس عراقچی، وەزیری دەرەوەی ڕژیمی ئاخوندی ڕۆژی یەکشەممە لە کۆبوونەوەی کابینەی حکوومەتی ئێران سەبارەت بە دوایین دۆخی دانوستانی ئەتۆمی نێوان ڕژیمی ئاخوندی و ئەمریکا ڕایگەیاند: وەڵامێکی گونجاو بۆ پێشنیاری ئەمریکا بەم زووانە دەدرێتەوە. پێشتر کارۆلین لیڤیت، وتەبێژی کۆشکی سپی، سەبارەت بە سزای نوێ بەسەر ڕژیمی ئاخوندی، ڕایگەیاند: سەرۆک ترامپ بە ڕوونی ڕایگەیاندووە کە ڕژیمی ئێران هەرگیز نابێت بۆمبی ئەتۆمی بەدەست بهێنێت. ناوبراو وتیشی: نێردەی تایبەت ستیڤ ویتکوف پێشنیارێکی ورد و قبوڵکراوی پێشکەش بە ڕژیمی ئێران کردووە و لە بەرژەوەندی ئەواندایە کە ئەم پێشنیارە قبوڵ بکەن. دانوستانە ئەتۆمییەکانی ڕژیمی ئاخوندی و ئەمریکا لە ٢٣ی خەرمانان بە خولی پێنجەمی دانوستانەکان لە ڕۆم کۆتایی پێهات. دواتر بەرپرسێکی باڵای ئەمەریکا ڕایگەیاند، هەر دوو لایەن ڕێککەوتوون کە بەم نزیکانە جارێکی دیکە کۆببنەوە. بەڵام سی ئێن ئێن بە پشت بەستن بە سەرچاوە ئاگادارەکان لەم بابەتە بڵاویکردەوە کە خولی داهاتووی دانوستانەکان گومانی جددی لەسەرە و ڕەنگە بە هیچ شێوەیەک ڕوو نەدات.
