سازمانی خه‌باتی کوردستانی ئێران
چوار کەس لە تەقینەوەیەکدا لە بنکەیەکی سەربازیی ئەمریکا لە ژاپۆن بریندار بوون
لە بنکەیەکی ئاسمانیی هێزەکانی ئەمریکا لە ژاپۆن، تەقینەوەیەک روویدا و چوار کەس بریندار بوون. بەرپرسانی حکومەتی ژاپۆن دەڵێن، تەقینەوەکە لە نێو کۆگایەکی بۆمبە نەتەقیوەکان روویداوە و بریندارەکان لە دۆخێکی ئەمندان. بەرگریی شارستانیی ژاپۆن باس لەوە دەکات، لە بنکەی ئاسمانیی کادێنا، لەکاتی پاککردنەوەی هەندێک کەرەستەی ئاسنین لە ژەنگ بۆ ئەوەی بزانن ئایا بۆمبن یان نا، یەکێکیان تەقیوەتەوەو چوار کەس کە بریندار بوون، ئەندامی بەرگریی شارستانیی ژاپۆنن و خێرا گەیێندراونەتە نەخۆشخانە. وتەبێژێکی وەزارەتی بەرگریی ئەمریکاش ڕایگەیاند کە تەقینەوەیەک لە بنکەی ئاسمانیی کادێنا روویداوە کە دەکەوێتە گەورەترین دوورگەی هەرێمی ئۆکیناوا لە باشووری ژاپۆن.
