سازمانی خه‌باتی کوردستانی ئێران
بەپێی ڕاپۆرتی سەرچاوە ئاگادارەکان لە ئابادان، هێرشەکانی ئەم دواییەی سپای ئیسرائیل بۆ سەر پاڵاوگەی نەوتی ئابادان نەبووە، بەڵکو لەسەر سیستەمی بەرگری ئاسمانی بووە کە دەکەوێتە نزیک پاڵاوگەکە.
ئەو ویدیۆیانەی لە سۆشیال میدیا بڵاوکراونەتەوە، دەریدەخەن کە دوکەڵێکی زۆر لە سەر ئاسمانی شاری ئابادانە. ئەو کەسەی فیلمی ڕووداوەکە دەگرێت، شوێنەکە بە "پادگانێکی سەربازی" وەسف دەکات. ئاژانسی هەواڵی مێهر هەروەها ڕایگەیاند کە ئەو گرتە ڤیدیۆییە لە ئابادانە. هەندێک لە ڕاپۆرتە نافەرمییەکان باس لەوە دەکەن کە شوێنی ڕووداوەکە بنکەی دەریایی بەهمەنشیرە. ئیسرائیل ڕۆژی شەممە دووەم ڕۆژی هێرشی ڕاستەوخۆی بۆ سەر ڕژیمی ئێران دەستپێکرد.
ڕاپۆرتەکان و وێنە بڵاوکراوەکان ئاماژەن بۆ تەقینەوەیەکی بەرفراوان لە ئابادان دەکەن. بەگوێرەی ئەو ڕاپۆرتانە کە بۆ هێرشە ئاسمانییەکانی ئیسرائیل دەگەڕێتەوە، دانیشتوانی ناوچەکە بە بیستنی تەقینەوەکە ڕژاونەتە سەر شەقامەکان و لە نزیک شوێنی ڕووداوەکە کۆبوونەوە.
سەرچاوە ئاگادارەکان پێشتر ڕایانگەیاندوو کە هێرشەکە بۆ سەر سیستەمی بەرگری ئاسمانی لە نزیک پاڵاوگەی ئابادان و بەهمەنشیر ئەنجامدراوە.
