سازمانی خه‌باتی کوردستانی ئێران
ڕۆژی چوارشەممە و هاوکات لەگەڵ شەشەمین ڕۆژی بەردەوامیی هێرشەکانی ئیسرائیل بۆ سەر حکومەتی ئێران، ڕژیم خەڵکی ئێرانی لە دەسڕاگەیشتن بە ئینتەرنێت بێبەری کرد.
وەزارەتی پێوەندییەکانی ڕژیم هەمان ڕۆژ بە دەرکردنی ڕاگەیەندراوێک، بەفەرمی پچڕان و سنووردارکردنەوەی هیڵی ئینتەرنێت لە ئێرانی لە ئەستۆ گرت.
لەو ڕاگەیەندراوەدا باس کراوە کە بە مەبەستی پێشگرتن لە ئاژاوەگێڕی دژمن، بڕیاری سنووردارکردن و پچڕاندنی کاتیی ئینتەرنێت دراوە.
ڕێکخراوی نێت بلاکس بەپێی داتاکانی خۆی ڕایگەیاند کە زۆرینەی نزیک لە تەواوی خەڵکی ئێران لە دەسپێڕاگەیشتن بە ئینتەرنێت بێبەری کراون.
دواتریش ڕایانگەیاند کە هەموو پلەتفۆرمە نێونەتەوەییەکان فیلیتێر کراون.
ناوەندی بەرەنگاربوونەوە دژی تاوانە سازماندراوەکانی سپای پاسداران لە ڕاگەیەندراوێکدا داوای لە خەڵک کرد تاکوو لە گواستنەوەی زانیاری لەسەر بەرنامە دەرەکییەکان و بە تایبەت واتساپ و ئینستاگرام خۆ ببوێرن.
دوابەدوای هەککرانی سیستەمی بانکی سپهە، بەرپرسی پۆلیسی فەتا ڕایگەیاند کە بڵاوکردنەوەی هەر چەشنە هەواڵی ناڕاست، گەورەنیشاندانی هێرشەکانی ئیسرائیل و بڵاوکردنەوەی وێنە و ڤیدیۆی دەسکرد و گەورەکردنەوەی ڕێژە لە ژمارەی کوژراوان و برینداران تاوانە.
