سازمانی خه‌باتی کوردستانی ئێران
دوابەدوای تەقینەوەیەک لە گەڕەکی گیشە لە ناوەڕاستی تاران، سەرچاوە ئاگادارەکان بە ڕۆژنامەی شەرقیان ڕاگەیاند کە ئامانجی سەرەکی هێرشەکە زانایەکی ئەتۆمی حکومەتی ئێران بووە. هەروەها میدیا ئیسرائیلییەکان باسیان لەوە کردووە کە لە چوارچێوەی “ئۆپەراسیۆنی نارنیا” شارەزایەکی رژیمی ئێران کراوەتە ئامانج.
ڕۆژی هەینی ۳۰ی جۆزەردان، ئاژانسی هەواڵی دەوڵەتی “هەم میهەن” وێنەی تەقینەوەکەی گەڕەکی گیشەی بڵاوکردەوە و ڕایگەیاند کە ڕووداوەکە بەهۆی هێرشی فڕۆکەی بێفڕۆکەوانی ئیسرائیل بۆ سەر باڵەخانەیەکی ناوچەکە بووە.
لەلایەکی دیکەوە دوو دەزگای ڕاگەیاندنی ئیسرائیل بە ناوەکانی یەدیوت ئەهرۆنۆت و ئیسرائیل حەیۆم بڵاویان کردەوە کە ماڵی یەکێک لە "زانایانی ئەتۆمی" ڕژیمی ئێران لە یەکێک لە هێرشەکانی ئەم دواییەی ئیسرائیل بۆ سەر تاران کراوەتە ئامانج. هەرچەندە میدیاکان ناوی ئامانجەکەیان نەخستەڕوو، بەڵام نووسیویانە کە هەڵسەنگاندنی سەرەتایی دەرکەوتووە کە ئۆپەراسیۆنەکە سەرکەوتوو بوە.
ئاژانسی هەواڵی ڕۆیتەرز هەروەها ڕایگەیاندووە کە ئاپارتمانێک لە ناوەڕاستی تاران لە ئامانجەکانی هێرشەکانی سەعاتەکانی سەرەتای ڕۆژی هەینیدا بووە. ئەو وێنانەی کە لە ڕێگەی ئۆنلاینەوە بڵاوکراونەتەوە، هێرشێک بۆ سەر نهۆمی سەرەوەی باڵەخانەیەکی گەڕەکی گەیشە نیشان دەدەن.
