سازمانی خه‌باتی کوردستانی ئێران
دۆناڵد ترەمپ، سەرۆکی ویلایەتە یەکگرتووەکانی ئەمەریکا ڕایگەیاند، هێرشە سەربازییەکانی وڵاتەکەی "بەتەواوی " بنکە ئەتۆمییەکانی فۆردۆ و نەتەنز و ئیسفەهانیانی لەناوبرد. ناوبراو هۆشداریی بە رژیمی ئێراندا کە لە نێوان "ئاشتی" یان "کارەساتێکی گەورەتر" هەڵبژێرێت.
ترەمپ لە وتارێکی تەلەفزیۆنیدا لە کۆشکی سپییەوە ئاماژەی بەوەدا کە هێرشەکانی ئەمریکا "سەرکەوتنێکی سەربازی سەرسوڕهێنەر" بووە و دامەزراوە ئەتۆمییەکانی ئێرانی بە تەواوی لەناوبرچووە. پێداگری لەوەش کردەوە کە ئەگەر رژیمی ئێران بە خێرایی ئاشتی هەڵنەبژێرێت، ئامانجەکانی دیکەی ئەو وڵاتە بە " وردبینی و خێرایی و لێهاتوویی" هێرش دەکرێنە سەری.
سەرۆک کۆماری ئەمریکا هەروەها لە وتارەکەیدا وتی: رژیمی ئێران چل ساڵە دروشمی "مەرگ بۆ ئەمریکا" و "مەرگ بۆ ئیسرائیل" دەڵێتەوە. هەروەها رژیمی ئێران لە گیانلەدەستدانی سەدان ئەمریکی و "سەدان هەزار" هاووڵاتیی وڵاتانی جۆراوجۆر بە بەرپرسیار زانی.
ترەمپ هەروەها ستایشی هاوکارییە نزیکەکانی لەگەڵ بنیامین ناتانیاهۆ، سەرۆکوەزیرانی ئیسرائیل کرد و وتی، “ئێمە وەک تیمێکی باش کارمان کردووە بۆ نەهێشتنی ئەم هەڕەشە ترسناکە بۆ سەر ئیسرائیل”. ئاماژەی بەوەشکرد، هێرشەکانی ئەمشەو"سەختتر و ڕەنگە کوشندەتر" ئۆپەراسیۆن بووە، بەڵام ئامانجی دیکە بۆ ئەگەری هێرشەکانی داهاتوو هەیە.
سەرۆکی ئەمریکا هۆشداری دایە رژیمی ئێران کە ئەگەر "ئاشتی" قبوڵ نەکات، ڕووبەڕووی لێکەوتەی سەختتر دەبێتەوە و گوتی، "ئەوە یا ئاشتی دەبێت یان رژیمی ئێران ڕووبەڕووی کارەساتێکی زۆر گەورەتر لەوەی لە هەشت ڕۆژی ڕابردوودا بینیومانە دەبێتەوە ".
