سازمانی خه‌باتی کوردستانی ئێران
بە گوێرەی میدیاکانی ئیسرائیل، حەوت هاووڵاتیی ئیسرائیلی لە ئەنجامی دوا هێرشی مووشەکیی حکومەتی ئێران کوژراون.
میدیاکانی رژیمی ئێرانیش کوژرانی نۆ هاووڵاتییان لە ئەنجامی دوایین بۆمبارانەکانی ئیسرائیل، ڕاگەیاند.
پێش دەستپێکردنی ئاگربەستی نێوان حکومەتی ئێران و ئیسرائیل، بەرەبەیانیی ئەمڕۆ سێشەممە، سپای پاسداران، لە پێنج شەپۆلی جیاوازدا، زیاتر لە ٢٠ مووشەکی بالیستی گرتە ئیسرائیل.
بە گوێرەی میدیاکانی ئیسرائیل، حەوت کەس لە شاری "بیئرسەبع" لە ئەنجامی کەوتنەخوارەوەی مووشەکە بالیستیکی ڕژیمی ئێران کوژراون و زیاتر لە ٣٠ کەسی دیکەش بریندار بوون. هاوکات، چاوەڕێ دەکرێت، ژمارەکە زیاتر بەرز ببێتەوە، بەو پێیەی دۆخی بەشێک لە برینداران ناجێگیرە.
ئیسرائیل لە بەرەبەیانیی ئەمڕۆوە، چەندان شوێنی جیاوازی لە تاران بۆمباران کردووە. بە گوێرەی میدیا ناخۆییەکانی ئێران، لە ئەنجامدا نۆ کەس کوژراون و زیاتر لە ٢٠ی دیکەش بریندار بوون.
