سازمانی خه‌باتی کوردستانی ئێران
دادستانی ئیسرائیل لە دژی دوو گەنجی ئیسرائیلی کە لە شاری تیبیریا دەژین و بە هاوکاری لەگەڵ ڕژیمی ئاخوندی و کۆکردنەوەی زانیاری ئەمنی و بەشداریکردن لە پیلانێک بۆ ترۆرکردنی بەرپرسێکی باڵای ئیسرائیل تاوانبار دەکات.بەپێی ئەو تاوانانە، یۆنی سێگال تەمەن ١٨ ساڵ و عومەر میزراهی تەمەن ٢٠ ساڵ، لە ناوەڕاستی مانگی ئایارەوە تا گیرانیان لە ١٥ی جۆزەردان، نزیکەی مانگێک لەگەڵ چەند بەکرێگیراوێکی ئیتلاعاتی ڕژیمی ئێران پەیوەندییان هەبووە.ئەو دوو کەسە لە کاتی ئامادەکاری بۆ گەشتکردن بۆ ئێران بۆ وەرگرتنی مەشقی تەقەکردن گیراون؛ ئامانجی کۆتایییان ترۆرکردنی بەرپرسێکی باڵای ئیسرائیل بوو کە ناسنامەکەی بۆ تۆمەتباران ئاشکرا نەکرابوو. سیخوڕانی ڕژیمی ئێران بەڵێنیان دابوو ئەگەر ئەو ئەرکە ئەنجام بدەن بڕی (٦٠ هەزار دۆلار) وەک دراوی کریپتۆ بە هەریەک لە تۆمەتباران بدەن و ئەوان و خێزانەکانیان بۆ ئێران دەگوازنەوە.بە وتەی داواکاری گشتی ئەو دوو گەنجە بە ئەرکی سادە دەستیان بە چالاکییەکانیان کردووە، وەک نووسینی وشەی “بیبی دیکتاتۆرە” لەسەر کاغەز و دراوەکان و وێنەگرتنی خۆیان لە سووتاندنی نووسینەکە.پاشان داوایان لێکردن زانیاری لە مۆڵەکانی بازرگانی و نەخۆشخانەکان کۆبکەنەوە، لە بەرامبەردا ڕۆژانە (نزیکەی ٢٩٨ دۆلار)یان پێدەدرا.
