سازمانی خه‌باتی کوردستانی ئێران
نێرگس محەممەدی چالاکی مافی مرۆڤ و براوەی خەڵاتی نۆبڵی ئاشتی لە پەیامێکی ڤیدیۆییدا سەبارەت بە پەرەسەندنی سەرکوت لە ئێران دوای شەڕی ١٢ ڕۆژە لەگەڵ ئیسرائیل هۆشداری دا و ڕایگەیاند: حکومەتی ئێران دۆخی دوای ململانێکان دەقۆزێتەوە بۆ زیادکردنی فشار لەسەر چالاکانی مەدەنی و ناڕازییان و زیندانیانی سیاسی.محەممەدی، کە لە ماڵەکەی خۆی لە تاران پەیامی خۆی بۆ تۆڕی ئەی بی سی نیوزی ئەمریکی ناردووە، ڕایگەیاند: شەپۆلی بەربڵاوی گیران و زیادبوونی ئێعدامەکان دوای شەڕ نیشانی دا کە ڕژیمی ئێران سەرکوتی ناوخۆیی بە ئامانجی "دروستکردنی ترس و تیرۆر" لە کۆمەڵگادا توندتر کردووەتەوە.ناوبراو پیداگریی لەوە کردەوە: "ئێمە ئێستا شایەتحاڵی پەرەسەندنی شەڕی نێوان ڕژیمی ئێران و خەڵکی ئێرانین؛ شەڕێک کە ٤٦ ساڵە بەردەوامە." محەممەدی لە وەڵامی ئیدیعای “سەرکەوتن”ی ڕژیمی ئێران لە شەڕی ئەم دواییە، ئەو ئیدیعایەی ڕەتکردەوە و ڕایگەیاند: “بە سادەیی باوەڕم بەم شتە نییە، شەڕ ئامرازەکانی گەیشتن بە مافەکانی مرۆڤ و دێموکراسی، وەک کۆمەڵگەی مەدەنی لاواز دەکات”.نێرگس محەممەدی، کە ماوەی ١٣ ساڵ و ٩ مانگ لە زیندانی ئێڤین بەسەر دەبات، لە ئێستادا بە هۆی نەشتەرگەری پێویست لە مۆڵەتی پزیشکیدایە، بەڵام سەرەڕای ئەوەی فەرمانی گەڕانەوەی بۆ دەرچووە، ئامادەنەبوو بچێتە زیندان.
