سازمانی خه‌باتی کوردستانی ئێران
ڕۆژنامەی وۆڵ ستریت جۆرناڵ، بە ئاماژەدان بە دیداری ئەم دواییەی بنیامین ناتانیاهۆ لەگەڵ دۆناڵد ترەمپ، نووسیویەتی، ناتانیاهۆ لە کۆبوونەوەیەکی تایبەتدا ڕایگەیاندووە، ئەگەر ڕژیمی ئێران جارێکی دیکە بەرەو دروستکردنی چەکی ئەتۆمی هەنگاو بنێت، ئیسرائیل هێرشی سەربازی نوێ دەستپێدەکات، هەروەها ترەمپ دژایەتی پلانەکەی ئیسرائیلی نەکردووە.بەگوێرەی ڕاپۆرتەکە، ترەمپ لە وەڵامی ناتانیاهۆدا پیداگریی لەوە کردووەتەوە کە پشتیوانی لە چارەسەری دیپلۆماسی لەگەڵ ڕژیمی ئیران دەکات، بەڵام دژایەتی ئەو پلانەی ئیسرائیلی نەکردووە.بەرپرسێکی باڵای ئیسرائیل بە ڕۆژنامەی وۆڵ ستریت جۆرناڵی ڕاگەیاندووە، مەرج نییە وڵاتەکەی داوای ڕێگەپێدانی فەرمی ئەمریکا بکات بۆ هێرشە نوێیەکان، بەڵام ئەگەر ڕژیمی ئێران بە شێوەیەکی بەرفراوان بەرنامە ئەتۆمییەکەی دەستپێبکاتەوە، ڕەنگە ترەمپ دژایەتی نەتانیاهۆ بکات بۆ ئەوەی ڕێگەی دیپلۆماسی بپارێزێت.ڕاپۆرتەکە بە ئاماژەدان بە مەترسی هێرش بۆ سەر ڕژیمی ئێران نووسیویەتی، ئەگەر ڕژیم داواکاریی ترامپ بۆ ڕاگرتنی پیتاندن ڕەت بکاتەوە و دەست بە چالاکییە ئەتۆمییەکانی بکاتەوە، ڕەنگە ڕووبەڕووی هێرشی نوێ لە لایەن ئیسرائیل و تەنانەت ئەمریکاشەوە ڕووبەڕوو ببێتەوە، کە ئەمەش هەڕەشەیەکی جیددییە بۆ سەر مانەوەی ڕێژیم.
