سازمانی خه‌باتی کوردستانی ئێران
ڕوانگەی سووری بۆ مافەکانی مرۆڤ ئاشکرای کرد، ژمارەی کوژراوانی شەڕ و گرژییەکانی شاری سوەیدا گەیشتە زیاتر لە 200 کەس کە 93یان ئەندامانی هێزەکانی سەر بە سپای احمد شرعن. شەڕ لە شاری سوەیدا پێی نایە ڕۆژی چوارەم، ڕۆژی سێشەممە هێزەکانی سەر بە وەزارەتی بەرگریی حکومەتی سوریە چوونە نێو شارەکە و تاوەکو ئێستا شەڕ لەنێوان چەکدارانی خێلە بەدەوییەکان و سپا لەلایەک و ئەو چەکدارانە و گرووپە چەکدارەکانی درووزەکان لەلایەکی دیکەوە بەردەوامە. ڕوانگەی سووری بۆ مافەکانی مرۆڤ ڕایگەیاند: چەندین هێڵی کارەبای گەورە لەکارخراون و بەهۆیەوە کارەبا لە گەڕەکەکانی شاری سویدا و ڕیفی ڕۆژئاوای ئەو شارە پچڕاوە، هاوکات وێستگەکانی دابەشکردنی ئاویش لە کارکردن وەستاون و لە بەیانیی دوێنێوە دانیشتووانی ئەو ناوچانە بێ ئاو ماونەتەوە.
