سازمانی خه‌باتی کوردستانی ئێران
بڵاوکرانی ئامارێک لە کوژران و برینداربوونی کرێکاران لە ماوەی ساڵیکدا
دادپزیشکیی حکومتی ئێران دەڵێت، لە 21-03-2024 تاوەکو 21-03-2025، دوو هەزار کرێکار لە کوردستانی ئێران و ئێران بەهۆی رووداوی کارەوە کوژراون. بەپێی راپۆرتەکە، لەو ڕێژەیە 1985 کەسیان پیاو و 15 کەسیان ژن بوون.لە راپۆرتەکەدا هاتووە، هەر لەو ماوەیەدا 26 هەزار و 548 کەسیش برینداربوون. دادپزیشکیی حکومتی ئێران دەڵێت، لەو یەک ساڵەدا زۆرترین کرێکار کە لە رووداوەکانی کاردا برینداربوون لە پارێزگاکانی تاران، خۆراسانی رەزەوی، ئیسفەهان، فارس و خوزستان بوون بە شیوەیەک لەو پارێزگایانەدا 15 هەزار کرێکار برینداربوون.راپۆرتەکە ئاماژە بەوەش دەکات، 957 کەس بەهۆی کەوتنەخوارەوە لە باڵەخانە کوژراون، 399 کەسیان بەهۆی بەرکەوتنی کەلوپەلی قورس بەر جەستە و سەریان کوژراون، 283 کەسیان بەهۆی تەزووی کارەبا کوژراون، 118 کەسیان سووتاون و 40 کەسیان خنکاون و 189 کەسەکەی دیکە بە هۆکاری دیکە کوژراون.
