سازمانی خه‌باتی کوردستانی ئێران
ساڵێک دوای تەقینەوەی، کانی "مەعدەنجو" لە شاری تەبەس، کە بووە هۆی کوژرانی ٥٢ کرێکار و برینداربوونی ١٤ی دیکە، ڕۆژنامەی "هەم میهەن" لە گفتوگۆیەکدا لەگەڵ خانەوادەی دوو کەس لە بریندارەکان، ڕایگەیاندووە کە ئەوان تووشی کێشەی بیرەوەری (یادەوەری) بوون؛ یەکێکیان هێشتا خانەودەکەیی ناناسێتەوە و ئەوی دیکەیان تووشی لەبیرچوونەوە (زەهایمەر) بووە. بەپێی ڕاپۆرتەکە، مەهدی عەلیزادە، یەکێک لە بریندارەکان، بەهۆی لەکارکەوتنی خانەکانی مێشکی لە ئەنجامی هەڵمژینی گازی میسان لە کانەکەدا، ماوەی ساڵێکە هاوسەر و سێ منداڵە هەرزەکارەکەی ناناسێتەوە و دەرمانی ئارامکەرەوە بەکاردەهێنێت. ئەمە لە کاتێکدایە کە تا ئێستا هیچ بڕە (دیە) بۆی دیاری نەکراوە.هەروەها، عەلیرەزا کەدەیی، بریندارێکی دیکەی ڕووداوەکەیە کە دوای ڕووداوەکە لە هاوسەرەکەی جیابووەتەوە و خانەوادەکەی ناچار بوون بەڵگەنامەی تووشبوونی بە "زەهایمەر"ی بۆ دەربهێنن.دوو برینداری دیکەش بە ناوەکانی حەسەن قولی‌نژاد بەهۆی زیانی جەستەییەوە نەیتوانیوە بگەڕێتەوە سەر کار، و محەممەد. ، دوای گەڕانەوەیەکی کورت بۆ سەر کار، بەهۆی کەمیی مووچە و نەبوونی ورەی کارکردن، بۆ هەمیشە کانەکەی جێهێشتووە.لە ڕاپۆرتەکەی ڕۆژنامەی "هەم میهەن"دا هاتووە کە هیچ کام لەم چوار بریندارە تا ئێستا دیەیان وەرنەگرتووە و دۆسیەکەیان چاوەڕێی بڕیاری پزیشکی دادوەری و لێکۆڵینەوەی دادگاییە.
