سازمانی خهباتی کوردستانی ئێران
وەزارەتی خەزێنەی ئەمریکا سێشەممە ڕایگەیاند کە کەسێک، حەوت کۆمپانیا و نۆ تانکی نەوتی بەهۆی ڕۆڵیان لە قاچاخچێتی نەوتی ڕژیمی ئێران و بەکارهێنانی بۆ بەدەرکردنی سزاکانی دژی ڕژیمی ئاخوندی، سزای داوە.بەپێی بەیاننامەیەکی نووسینگەی کۆنترۆڵی سەروەت و سامانی بیانی سەر بە وەزارەتی خەزێنە، کەسی سزادراو "وەلید خالید حەمید سامەڕائی" بازرگانێکی عێراقی-کوێتی نیشتەجێی ئیماراتە کە تۆڕێک لە کۆمپانیاکانی گواستنەوە و بازرگانیکردنی نەوت بەڕێوەدەبات. ئەم تۆڕە سەدان ملیۆن دۆلاری بۆ ڕژیمی ئاخوندی و خودی سامەڕائی بەدەستهێناوە، بە تێکەڵکردنی نەوتی ڕژیمی ئێران لەگەڵ نەوتی عێراق و فرۆشتنی وەک نەوتی عێراقی.وەزارەتی خەزێنەی ئەمریکا ڕایگەیاند کە ئەم تۆڕە چەندین تانکی نەوتی بە ئاڵای لیبریاوە بەکارهێناوە بۆ گواستنەوەی نەوت لە کەشتییەکەوە بۆ کەشتییەکی دیکە لە کەنداو و بەندەرەکانی عێراق، و بە دامەزراندنی کۆمپانیا ساختەکان لە دوورگەکانی مارشاڵ، کۆنترۆڵی ڕاستەقینەی سامەڕائی بەسەر ئەم تانکیانەدا شاردووەتەوە.هەروەها ئەم تانکیانە شێوازگەلێکی وەک گواستنەوەی شەوانە، ساختەکردنی سیستەمی ناسینەوەی خۆکار و دروستکردنی کەلێنی بەئەنقەست لە ڕاپۆرتی شوێن بۆ شاردنەوەی چالاکییەکانیان بەکارهێناوە.
