سازمانی خهباتی کوردستانی ئێران
بەپێی ڕاپۆرتی "حالوش"، "ئیرەج شەمس" یەکێک لە فەرماندەکانی ناوخۆیی ئیتلاعاتی سپای ترۆریستی پاسداران، شەوی شەممە لە شاری پیشین سەر بە شارستانی ڕاسک، لەلایەن چەند چەکدارێکەوە تەقەی لێکراوە و کوژراوە. هۆی ڕووداوەکە و ناسنامەی ئەو چەکدارانەی فەرماندەکەیان کوشتووە، هێشتا نادیارە. "حالوش" بە پشتبەستن بە ڕاپۆرتەکان نووسیویەتی کە ئەو فەرماندەیە لە ئەرکە جیاوازەکانیدا لە ناوچەی پیشین، لەوانە سەرکوتکردنی هاوڵاتیان، ڕۆڵی هەبووە. سەرچاوە خۆجێییەکان ڕایانگەیاندووە کە ئیرەج شەمس، کوڕی محەمەد کەریم و خەڵکی پیشین بووە. کاتی هێرشەکە لە یەکێک لە سەرتاشخانەکانی بازاڕی شارەکەدا بووە و نزیکەی سەعات ۹ی شەو تەقەی لێکراوە. چەکدارەکان بە تەقەی بەردەوام کردوویانەتە ئامانج و ناوبراو لە شوێنی ڕووداوەکە کوژراوە.
