سازمانی خهباتی کوردستانی ئێران
وڵاتانی ئەندامی گرووپی حەوت لەگەڵ هەندێک لە هاوپەیمانەکانیان، کردەوەکانی ڕژیمی ئاخوندی لە سەرکوت و تۆقاندنی نەیارانی سیاسی لە دەرەوەی سنوورەکانی ئێراندا سەرکۆنە کرد و پێداگریان لەسەر وەستانەوە لە دژی ئەو کارانە کردەوە. ئەندامانی میکانیزمی وەڵامدانەوەی خێرای گرووپی حەوت لەگەڵ وڵاتانی هاوکار، ڕۆژی هەینی ٢١ی خەرمانان بە دەرکردنی بەیاننامەیەکی هاوبەش نووسییان کە دەزگا هەواڵگرییەکانی ڕژیمی ئاخوندی لە ساڵانی ڕابردوودا هەوڵیان داوە ڕفاندن، ئازاردان، و تەنانەت ترۆرکردنی نەیارانی سیاسی لە شوێنە جیاوازەکانی جیهاندا ئەنجام بدەن؛ پرۆسەیەک کە "جێگەی نیگەرانی و قبوڵنەکراوەیە". ئەم بەیاننامەیە جگە لە ئەندامانی گرووپی حەوت وڵاتە پیشەسازییەکەی جیهان (کە کەنەدا، فەرەنسا، ئەڵمان، ئیتاڵیا، ژاپۆن، بەریتانیا و ویلایەتە یەکگرتووەکان دەگرێتەوە)، یەکێتی ئەوروپا و هەروەها ئوسترالیا، نیوزیلاند و هۆڵەند واژۆیان لەسەر کردووە. لە بەیاننامەی ئەو وڵاتانەدا ئاماژە بە چالاکییەکانی دیکەی ڕژیمی ئاخوندی کراوە، کە بریتییە لە هەوڵدان بۆ دەستڕاگەیشتن و بڵاوکردنەوەی زانیاری کەسی ڕۆژنامەنووسان و کردەوەکان بۆ دروستکردنی کەلێن لە کۆمەڵگاکاندا و تۆقاندنی کۆمەڵگەی جووەکان.
