سازمانی خهباتی کوردستانی ئێران
رۆژنامەی لومۆندی فەرەنسی، بە گێڕانەوە لە سەرچاوەیەکی دیپلۆماسی نزیک لە کۆشکی ئیلیزێ، بڵاوی کردەوە کە ئیسرائیل لە هەڵسەنگاندنێکدا کە پێشکەشی فەرەنسای کردووە، ڕایگەیاند کە دامەزراوە ئەتۆمییەکانی ڕژیمی ئاخوندی لە شەڕی ١٢ ڕۆژەدا بە تەواوی وێران نەکراون و بە تێپەڕبوونی کات دەکرێت دووبارە بنیات بنرێنەوە. بەگوێرەی ئەم هەڵسەنگاندنە کە بەرپرسانی ئیسرائیلی لە سەرەتای مانگی ئەیلوولدا لە پێداچوونەوەیان بۆ هێرشەکانی شەڕی ١٢ ڕۆژە دژی دامەزراوە ئەتۆمییەکانی ڕژیمی ئاخوندی پێشکەشی بەرپرسانی فەرەنسییان کرد، سەرەڕای وێرانبوونی زۆربەی دامەزراوە ئەتۆمییەکانی ڕژیمی ئێران، بەتایبەتی لە فۆردۆ و نەتەنز، ڕژیمی ئێران هێشتا ئەو جۆرە ئامێرانەی لەبەردەستدایە. بە نووسینی لومۆند، پرسیارەکە لە ئێستادا ئەوەیە کە ئایا ڕژیمی ئێران بە ڕادەی پێویست ئەم جۆرە ئامێرانەی لەبەردەستدایە یان نا؟ئەو سەرچاوە دیپلۆماسییە ڕایگەیاند دوای هێرشەکانی ئیسرائیل، ڕژیمی ئاخوندی بۆ دەستپێکردنەوەی پڕۆگرامە ئەتۆمییەکەی لە کورتخایەندا ئامێری پێویستی نییە، بەڵام ئەم کارە بە تێپەڕبوونی کات ئەگەری هەیە.
