سازمانی خهباتی کوردستانی ئێران
وەزارەتی دەرەوەی هیندستان بە بڵاوکردنەوەی بەیاننامەیەک، بە توندی هۆشداری دایە هاوڵاتیانی وڵاتەکەی ئاگاداری ڕیکلامە درۆینەکانی کار بن کە خەڵک بە بەڵێنی دامەزراندن ڕادەکێشنە ئێران، چونکە لەم دواییانەدا ژمارەیەک هاوڵاتی هیندی بەهۆی فریودانی ئەم ڕیکلامانەوە لە ئێران ڕفێنراون.بەپێی ڕاگەیاندنی ئەو وەزارەتە، لە چەند حەوتویی ڕابردوودا ژمارەیەکی زیاتر لە هاوڵاتیانی هیندی بە بەڵێنی هەلی کار یان ئەگەری کۆچکردن بۆ وڵاتانی دیکە فریودراون و سەردانی ئێرانیان کردووە، بەڵام دوای گەیشتنیان بە ئێران، لەلایەن گروپە تاوانبارەکانەوە ڕفێنراون و خێزانەکانیان داوای پارەیان لێکراوە بۆ ئازادکردنیان.لەو هۆشدارییەدا پیداگریی لەوە کراوەتەوە کە چوونەژوورەوەی هاوڵاتیانی هیندی بۆ ئێران بەبێ ڤیزا تەنها بە مەبەستی گەشتیاری ڕێگەپێدراوە و هەر بانگەشەیەک لەلایەن دەزگاکانەوە سەبارەت بە ئاسانکاری گەشتکردن بەبێ ڤیزا بۆ کار یان مەبەستی گەشتیاری، بە ئەگەری زۆرەوە هاوکاریکردنی تۆڕە تاوانبارەکانە. وەزارەتی دەرەوەی هیندستان داوای لە هەموو هاوڵاتیان کرد کە لە بەرامبەر پێشنیارەکانی کار لە دەرەوەی وڵات، زۆرترین وریایی بنوێنن و هەر چالاکییەکی گوماناوی دەستبەجێ بە دەسەڵاتداران ڕابگەیەنن. لەو بەیاننامەیەدا هاتووە: "بە توندی هۆشداری دەدرێتە هەموو هاوڵاتیانی هیندی کە لە بەرانبەر بەو بەڵێنانە زۆرترین وریایی بنوێنن."
