سازمانی خهباتی کوردستانی ئێران
دووبارە گڕگرتنی زبڵدانی شەمامە لە نزیک شاری جوانڕۆ، جارێکی دیکە ڕوویەکی ناشرینی کەمتەرخەمی حکومەتی ڕژیمی ئاخوندی ئێرانی لە ئاست تەندروستیی هاووڵاتیان و پاراستنی ژینگەدا خستەوە ڕوو. ئەو ڕووداوە، کە بووەتە هۆی بڵاوبوونەوەی بۆنی ناخۆش و دووکەڵی توند بۆ سەر گەڕەکەکانی شار، نیشانەی کەموکوڕییەکی گەورەیە لە بەڕێوەبردنی پاشماوەکان و نەبوونی چارەسەرێکی ژینگەیی و درێژخایەن بۆ ئەو کێشە بنەڕەتییە. زیانە تەندروستییەکانی ئەو دووکەڵە بۆ سەر سییەکانی دانیشتووان، بەتایبەت منداڵان و بەساڵاچووان، جێگەی نیگەرانییەکی زۆرە و داهاتووی تەندروستیی خەڵکی ناوچەکە دەخاتە مەترسییەوە. لە کاتێکدا حکومەت دەبوو پلانی ستراتیژی بۆ ڕیسایی کردن و بەڕێوەبردنی پاشماوەکان دابنێت، بەڵام بەردەوامبوون لە پشتبەستن بە زبڵدانێکی کراوە کە بە ئاسانی گڕ دەگرێت، پرسیار لەسەر جددییەتی حکومەت لە ئاست پرسە ژینگەیی و تەندروستییەکاندا دروست دەکات.
