سازمانی خهباتی کوردستانی ئێران
بەریتانیا ، ١٢١ کەس و دامەزراوەی ڕژیم دەکاتە ئامانج
وەزارەتی دەرەوەی بەریتانیا ڕایگەیاند کە لە چوارچێوەی چالاککردنەوەی میکانیزمی "ماشە" و گەڕاندنەوەی سزاکانی نەتەوە یەکگرتووەکان دژی ڕژیمی ئاخوندی ئێران، سزاکانی بەسەر ١٢١ کەس و دامەزراوەی پەیوەندیدار بە بەرنامە ناوکەیی و مووشەکی حکومەتی ئێراندا سەپاندووەتەوە. بەپێی بەیاننامەی وەزارەتی دەرەوەی بەریتانیا، کە ڕۆژی چوارشەممە، ٩ی ئۆکتوبەر، بڵاوکرایەوە، سزاکان بریتین لە گەمارۆی چەکداریی نەتەوە یەکگرتووەکان لە بواری گواستنەوەی چەکی کۆنڤەنشنال بۆ ئێران و لە ئێرانەوە، قەدەغەکردنی دابینکردن یان گواستنەوەی کەرەستە، ماددە، ئامێر، کاڵا و تەکنەلۆژیا پەیوەندیدارەکان بە پیتاندن، دووبارە پڕۆسێسکردنەوە ، هەروەها پەرەپێدانی سیستەمەکانی هەڵدانی چەکی ناوکەیی. سەرەڕای ئەمانە، سنووردارکردنە دارایی و بازرگانییەکانی پەیوەندیدار بە بەرنامە ناوکەیی و مووشەکی ڕژیمی ئاخوندی جارێکی تر جێبەجێ کراونەتەوە. لە نێوان ئەو کەسانەی سزاکانیان بەسەردا سەپێندراوە، ناوی بەرپرسە باڵاکانی ڕژیمی ئاخوندی وەک عەلی ئەکبەر ئەحمەدیان، ئەحمەد وەحیدی، محەمەد حەجازی، محەمەدڕەزا نەقدی، محەمەد ئیسلامی، یەحیا ڕەحیم سەفەوی و مورتەزا سەفاری دەبینرێت.
