سازمانی خهباتی کوردستانی ئێران
لە وڵاتێکدا کە زۆرینەی خەڵکەکەی لەژێر هێڵی هەژاریدا دەژین، حەبیب ئەسەدۆڵڵانژاد، بەڕێوەبەری جێبەجێکاری یەکێتی بەخێوکەرانی مریشکی گۆشتی، بە شانازییەوە ڕایگەیاندووە کە نرخی فەرمی مریشک لە ئێران گەیشتووەتە زیاتر لە ١٣٥ هەزار تمەن بۆ هەر کیلۆیەک. ئەمە لە کاتێکدایە کە پێشتر، واتە بە نرخی کەمتر لەوەش، زۆربەی خێزانە ئێرانییەکان توانای کڕینی مریشکیان نەبووە بەبڕی پێویست. ئەم ڕاگەیاندنە هیچ شتێکی نوێ نییە جگە لە قووڵکردنەوەی برینی خەڵکی هەژار و مامناوەند. ئەسەدۆڵڵانژاد ، بە بێشەرمییەوە ژمارە نوێیەکانی ڕاگەیاند؛ هەر جووچکێکی یەک ڕۆژە ٣٢ هەزار و ٧٠٠ تمەن و مریشکی گەورەش بۆ بەکاربەر بە ١٣٥ هەزار و ٧٠٠ تمەن دەفرۆشرێت. قسەکانی ئەو کە گوایە "بە ڕاگەیاندنی نرخی نوێ، دابینکردنی مریشک بۆ یەکە پیشەییەکان خێراتر دەبێت و بازاڕ جێگیر دەبێت" تەنها مایەی پێکەنینە و ڕاستی تاڵی خەڵک دەشارێتەوە. لە ڕۆژانی ڕابردوودا، نرخی ماددە خۆراکییە سەرەکییەکان وەک گۆشتی سوور، مریشک و باقلەمەنییەکان بە شێوەیەکی لەسەرخۆ بەرزبووەتەوە، بەڵام وەزیری کشتوکاڵی ڕژێمی ئێران بەبێ هیچ هەستێک بە هەلوومەرجی خەڵک، ئەو بەرزبوونەوەی نرخەی بە "لۆژیکی" ناوبردووە.
