سازمانی خهباتی کوردستانی ئێران
ڕۆژی یەکشەممە ٢٧ی ڕەزبەری ١٤٠٤، لە سەرکەوتنێکی کاتی بۆ مافی زیندانیان، مانگرتنی بەرفراوانی زیندانیانی گرتووخانەی قزلحەساری کەرەج، کە لە ناڕەزایەتی بەرامبەر شەپۆلی بێوێنەی لەسێدارەدانەکان لە ئێران دەستی پێکردبوو، دوای شەش ڕۆژ کۆتایی هات.ئەو مانگرتنە کە لە نیوەڕۆی دووشەممە ٢١ی ڕەزبەرەوە بە گواستنەوەی ١٦ زیندانی بۆ ژوورە تاکەکەسییەکان بۆ جێبەجێکردنی حوکمی لەسێدارەدان دەستی پکرد، بە خێرایی بۆ زیاتر لە ١٥٠٠ زیندانی لە بەندەکانی جیاوازدا بڵاوبووەوە و سەرنجی جیهانی بۆ دۆخی کارەساتباری مافەکانی مرۆڤ لە گرتووخانەکانی ڕژیمی ئاخوندی ڕاکێشا.زیندانیان، بە دروشمی ناڕەزایەتی دژی "ماشینی کوشتار"ی ڕژێم، ویدیۆیان لەناو زیندانەوە بڵاوکردەوە کە تێیدا داوای پشتیوانی خێرایان لە خەڵکی ئێران و دامەزراوە نێودەوڵەتییەکان دەکرد.خێزانەکانی زیندانیانیش لە ڕۆژانی ڕابردوودا بە کۆبوونەوەی ناڕەزایەتی لەبەردەم گرتووخانەی قزلحەسار و مجلسی ڕژیمی ئێران، کاردانەوەیان بەرامبەر جێبەجێکردنی حوکمەکانی لەسێدارەدان نیشاندا و داوای وەستاندنی دەستبەجێی ئەو پڕۆسەیەیان کرد.لە کۆتاییدا، ڕۆژی یەکشەممە ٢٧ی ڕەزبەر، بەرپرسانی قەزایی بە بەڵێنی هەڵپەساردنی کاتیی جێبەجێکردنی حوکمەکانی لەسێدارەدان بۆ ماوەی لانیکەم شەش مانگ، کۆتاییان بە مانگرتنی زیندانیان هێنا.
