سازمانی خهباتی کوردستانی ئێران
ڕێکخراوی پەیامنێرانی بێسنوور، ڕاپۆرتی ساڵانەی خۆی بڵاوکردەوە و تێیدا هۆشداری دەدات لە دۆخی مەترسیداری ڕۆژنامەنووسان. بەپێی ئەو ڕاپۆرتە نوێیە، ڕژیمی ئێران بە هەبوونی ٢١ ڕۆژنامەنووسی زیندانی و بێسەروشوێنبوونی ڕۆژنامەنووسێکی دیکە، جارێکی تر لە ڕیزی ئەو وڵاتانە جێگیر بووە کە زۆرترین ژمارەی ڕۆژنامەنووسیان خستووەتە پشت مەیلەکانی زیندان.
لە ڕیزبەندییە جیهانییەکەدا، ئێران لە پاڵ وڵاتانی وەک بیلاڕووس، ڤێتنام و کۆماری ئازەربایجاندا دێت، ئەوەش دوای ئەوەی چین، ڕووسیا و میانمار سێ پلەی یەکەمی لیستی سەرکوتکەرانی ڕۆژنامەنووسانیان گرتووە.
هاوکات لەگەڵ بڵاوکردنەوەی ڕاپۆرتەکە لە ڕۆژی سێشەممە، (تیبۆ برۆتن)، بەڕێوەبەری گشتیی پەیامنێرانی بێسنوور، هۆی سەرەکیی بەردەوامیی تاوانەکان دژی ڕۆژنامەنووسانی گەڕاندەوە بۆ "دەربازبوونی حکوومەتەکان لە سزا". برۆتن ڕەخنەی لە کۆمەڵگەی نێودەوڵەتی گرت و ڕایگەیاند: "شکستی ڕێکخراوە جیهانییەکان لە پاراستنی گیانی ڕۆژنامەنووسان، دەرئەنجامی کەمبوونەوەی ئازایەتی و بوێریی دەوڵەتەکانە لە جێبەجێکردنی سیاسەتەکانی پاراستنی ئازادیی ڕادەربڕین".
