سازمانی خهباتی کوردستانی ئێران
زانکۆی تاران جارێکی دیکە بووەوە بە سەنگەری ئازادیخوازان و ڕووبەڕووبوونەوەی دەسەڵاتی سەرکوتکەری ڕژیمی ئاخوندی. کەناڵی تێلێگرامی "خوێندکارانی یەکگرتوو" دیمەنێکی دەگمەن و پڕ لە ئازایەتی بڵاوکردووەتەوە، کە تێیدا لە ڕێوڕەسمی ١٦ی ئازەردا، خوێندکارێکی ناڕازی بەبێ ترس لە بەرامبەر "سەعید جەلیلی"، یەکێک لە دەموچاوە دیارەکانی ڕژێم دەوەستێتەوە و ڕاستییەکان بەڕووی دەسەڵاتدا دەدات.
ئەم خوێندکارە بە دەنگێکی بەرز و ڕاشکاوانە بە جەلیلی دەڵێت:
"ئێوە دەست و هەناسەتان بۆنی خوێنی لێ دێت.. ئێوە گیانی ژینا، نیکا و حەدیستان سەند؛ ژن، ژیان، ئازادی، نە وشەیەک کەمتر و نە وشەیەک زیاتر."
ئەم قسانە وەک چەکوشێک بوو بۆ سەر سەری بەرپرسانی ڕژێم؛ هەر بۆیە دەستبەجێ بەکرێگیراوان و لایەنگرانی دەسەڵات لە نێو هۆڵەکەدا، بۆ پەردەپۆشکردنی ئەم ڕیسواییە و کپکردنی دەنگی حەق، کەوتنە درووشمدانی سواوی "مەرگ بۆ مونافیق". بەڵام وەک دەبینرێت، تەنانەت لە ژێر چاودێرییە ئەمنییە توندەکانیشدا، ترس لە دڵی خوێندکاراندا نەماوە و ڕاستەوخۆ پەنجەی تاوان بۆ بکوژانی ڕۆڵەکانی گەلانی ئێران ڕادەکێشن.
