سازمانی خهباتی کوردستانی ئێران
وەزارەتی دەرەوەی کەنەدا: بەهۆی پێشێلکاریی مافەکانی مرۆڤەوە سزای ٤ بەرپرسی باڵای ڕژیمی ئێرانمان دا
لە درێژەی فشارە نێودەوڵەتییەکان بۆ سەر ڕژیمی ئێران، حکومەتی کەنەدا سزای نوێی بەسەر چوار بەرپرسی باڵای ڕژیمی ئێراندا سەپاند.
وەزارەتی دەرەوەی کەنەدا لە بەیاننامەیەکدا ڕایگەیاند، بەهۆی تێوەگلان لە "پێشێلکاریی ئاشکرا و سیستماتیکی مافەکانی مرۆڤ" و بەڕێوەبردنی سیاسەتی سەرکوتکەرانە، هەر یەک لە "موحسین کەریمی"، "ئەحمەد خادم سەیدولشوهەدا"، "مستەفا موحیبی" و "حەسەن ئاخەریان" خراونەتە لیستی سزاکانەوە.ئانیتا ئاناند، وەزیری دەرەوەی کەنەدا ڕایگەیاندووە، ئەو سزایانە وەڵامێکن بۆ بەردەوامیی سەرکوتکردنی دەنگی ناڕازی و بەکارهێنانی "هێزی کوشندە" لەلایەن ڕژیمی ئێراندا دژی خۆپیشاندەران. بەپێی ئامارەکان، تەنها لە مانگی ئۆکتۆبەری ٢٠٢٢ـەوە تا ئێستا، کەنەدا ١٨ گەڕی سزای دژی ڕژیمی ئێران بەڕێوە بردووە و لەو ماوەیەدا زیاتر لە ٢١٠ بەرپرس و ٢٥٤ دامەزراوەی حکومیی خستووەتە لیستی ڕەشەوە.
