سازمانی خهباتی کوردستانی ئێران
لەگەڵ نزیکبوونەوەی شەوی یەڵدا، قەیرانی ئابووری و بەرزبوونەوەی بێوێنەی نرخەکان، شادییەکانی ئەو جژنە مێژووییەی لە خەڵک دزیوە و زۆرینەی خێزانەکان توانای کڕینی پێداویستییەکانیان نەماوە.
بەپێی ڕاپۆرتە ئابوورییەکان، ئەمساڵ سفرەی شەوی یەڵدا بۆ زۆرینەی هاووڵاتییان لە ئێران و کوردستان بووەتە خەونێکی دەستپێنەگەیشتوو. ئامارەکان ئاماژە بەوە دەکەن کە توانای کڕینی خەڵک بۆ یەک لەسەر سێ دابەزیوە، ئەمەش لە کاتێکدایە کە ڕێژیم هیچ هەنگاوێکی کردەیی بۆ کۆنترۆڵکردنی نرخەکان نەناوە و تەنیا وەک تەماشاکەرێک ماوەتەوە.لە شاری ورمێ، نرخی ئاجیل و وشکەبار تا ٨٠٪ زیادیکردووە. دۆخەکە لە تاران و شارەکانی تریش جیاواز نییە و نرخەکان بە تێکڕا ٤٥٪ بەرزبوونەتەوە. چاودێران پێیان وایە ئەم داڕمانە ئابوورییە دەرەنجامی گەندەڵیی سیستەماتیک و خەرجکردنی سامانی وڵاتە بۆ گرووپە چەکدارەکان لە دەرەوەی سنوورەکان، کە زۆرترین فشاری خستووەتە سەر ناوچە پەراوێزخراوەکانی وەک کوردستان. بۆ زۆرێک لە هاووڵاتییان، یەڵدای ئەمساڵ لە بری جەژن، بووەتە دەرفەتێک بۆ دەربڕینی ناڕەزایەتی بەرامبەر بەو هەژارییەی بەسەریاندا سەپێنراوە.
