سازمانی خهباتی کوردستانی ئێران
هۆشداریی ترەمپ بۆ ڕژێمی ئێران و ئاماژەدان بە شەڕێکی نوێ
دۆناڵد ترەمپ لە نوێترین پۆستیدا کە نزیکەی ٤٠ خولەک پێش ئێستا بڵاوی کردووەتەوە، هۆشدارییەکی توند ئاراستەی ڕژیمی ئێران دەکات. ترەمپ ڕایگەیاندووە کە دوێنێ ڕژیمی ئێران بڕیاری داوە لە تەنگەی هورمز موشەک بتەقێنێت، ئەمەش بە تەواوی پێشێلکردنی ڕێککەوتنی ئاگربەستی نێوانیانە. بە وتەی ترەمپ، زۆربەی ئەو موشەکانە ئاراستەی کەشتییەکی فەرەنسی و کەشتییەکی بارهەڵگری بەریتانی کراون.
لە بەشێکی تری قسەکانیدا، ترەمپ ئاماژەی بەوە کردووە کە نوێنەرانی سبەی ئێوارە دەگەنە شاری ئیسلام ئابادی پایتەختی پاکستان بۆ دەستپێکردنی گەڕێکی نوێی گفتوگۆکان. ترەمپ بە تەنزەوە باسی لەوە کردووە کە ڕژیمی ئێران دەڵێت تەنگەی هورمز دادەخەن، لە کاتێکدا ئەوان پێشتر بە کردەوە زیانی زۆریان بەو ڕێڕەوە گەیاندووە و ڕۆژانە ٥٠٠ ملیۆن دۆلار زیان بە ئابووری خۆیان دەگەیەنن نەک ئەمریکا، چونکە کەشتییە ئەمریکییەکان ئێستا بەرەو تەکساس، لویسیانا و ئەلاسکا دەچن بۆ بارکردنی نەوت.
ترەمپ هەروەها هەڕەشەی ئەوە دەکات کە ئەگەر ڕژیمی ئێران ئەو ڕێککەوتنە "دادپەروەرانە و ژیرانەیە" قبوڵ نەکات کە پێشکەشیان کردوون، ئەوا ئەمریکا هەموو وێستگەیەکی کارەبا و پردێکی ئێران تێکدەشکێنێت و دەتەقێنێتەوە. ئەو دەڵێت "کاتی ئەوە هاتووە ئامێری کوشتنی ڕژیمی ئێران کۆتایی پێ بهێنرێت" و ئەو کارە دەکات کە سەرۆکەکانی پێشووی ئەمریکا لە ماوەی ٤٧ ساڵی ڕابردوودا نەیانتوانیوە بەرامبەر ڕژیمی ئێران ئەنجامی بدەن.
لە ئێستادا شاری ئیسلام ئاباد بۆ ئەم گفتوگۆیانە ئامادە دەکرێت و هوتێلە گەورەکانی وەک سێریێنا، ماریۆت و مۆڤەنپیک بۆ شاندە سیاسییەکان تەرخان کراون. ترەمپ ئاماژەی بەوەش کردووە کە تەنها کاتێک خۆی سەردانی پاکستان دەکات کە ڕێککەوتنەکە ئامادەی واژۆکردن بێت.
