سازمانی خهباتی کوردستانی ئێران
لە شاری زوریخی سویس یادی شەهیدانی هاوپەیمانی هێزە سیاسییەکانی کوردستانی ئێران بەرز ڕاگیرا
لە ڕێوڕەسمێکی شکۆداردا کە لە شاری زوریخی وڵاتی سویس بەڕێوەچوو، بە ئامادەبوونی
کومێتەی سویسی سازمانی خەبات و جەماوەرێکی بەرچاو لە کوردانی هەر چوار پارچەی کوردستان، یادی شەهیدانی
هاوپەیمانی هێزە سیاسییەکانی کوردستانی ئێران و هاونیشتمانیانی باشووری
کوردستان بەرز ڕاگیرا.
ڕێوڕەسمەکە بە داوای هاوپەیمانی حیزبە سیاسییەکانی کوردستانی ئێران ڕێکخرابوو،
تێیدا ئەندامانی حیزبەکانی ناو هاوپەیمانییەکە و ژمارەیەکی زۆر لە ڕەوەندی
کوردی لە سویس بەشداربوون، کە ئامادەییان نیشانەیەک بوو بۆ پێداگریی لەسەر
یەکگرتوویی و تەبایی نەتەوەیی.
سەرەتای مەراسیمەکە بە سرودی نەتەوەیی «ئەی ڕەقیب» و وەستان بۆ خولەکێک بێدەنگی بۆ
ڕێزگرتن لە گیانی پاکی شەهیدانی ڕێگای ئازادی دەستی پێکرد. دواتریش ئامادەبووان بە
دانانی چەپکە گوڵ لەسەر وێنەی گیانبەختکردووان، پەیمانی وەفادارییان بۆ ڕێبازەکەیان
ڕاگەیاند.
لە بەشێکی سەرەکی بەرنامەکەدا، کاک ئیدریس مورادی پەیامی فەرمی هاوپەیمانی حیزبە
سیاسییەکانی کوردستانی ئێرانی پێشکەش کرد. لە پەیامەکەدا تیشک خرایە سەر
بارودۆخی سیاسی و گرنگی بەردەوامی خەبات لە پێناو بەدیهێنانی مافە ڕەواکانی
گەلی کورد.
بۆ بەخشینی کەشێکی حەماسی بە کۆڕەکە، گرووپێکی مۆسیقا چەندین سرودی نەتەوەیی و
نیشتمانییان پێشکەش کرد، هەروەها چەندین پارچە شیعر لەلایەن شاعیرانەوە
خوێندرانەوە کە گوزارشتیان لە بەرخودان و ئازادیخوازی دەکرد.
لە کۆتایی ڕێوڕەسمەکەدا، بەشداربووان پێداگریان لەسەر ئەوە کردەوە کە ئەم
هاوپەیمانییەی نێوان حیزبەکان خاڵێکی وەرچەرخانە لە مێژووی خەباتی
کوردستانی ڕۆژهەڵات و پێویستە پەرەی پێ بدرێت. هەروەها داوا لە کۆمەڵگەی
نێودەوڵەتی کرا کە بێدەنگ نەبن لە ئاست تاوانەکانی ڕژیمی ئێران و بە
فەرمی کردەوەکانی ئەو ڕژێمە مەحکوم بکەن.
