سازمانی خهباتی کوردستانی ئێران
لە هەنگاوێکی نوێدا کە ئاماژەیە بۆ بەرزکردنەوەی ئاستی ئامادەباشی سەربازی
لە ناوچەکە، هێزەکانی دەریاییی ویلایەتە یەکگرتووەکانی ئەمەریکا مانۆڕێکی سەربازیی
تایبەتیان ئەنجامدا. ئەو مانۆڕە وەک پەیامێکی ڕوون بۆ ڕژیمی ئێران و ئامادەکارییەک بۆ هەر
ئەگەرێکی ڕووبەڕووبوونەوە لە ئاوە نێودەوڵەتییەکاندا دەبینرێت.
=================
فەرماندەیی ناوەندیی هێزەکانی ئەمەریکا (سێنتکۆم)، وێنەی مانۆڕێکی
وشکانی و دەریایی بڵاوکردەوە، کە تێیدا هێزە تایبەتەکان لە کۆپتەرێکی جۆری (MH-60S
Sea Hawk)ـەوە بە پەرەشوت دادەبەزنە سەر پشتی کەشتیی جەنگیی (یو ئێس ئێس تەریپڵی).
===================
ئەو مەشقە سەربازییە تەنها ڕاهێنانێکی ئاسایی نییە، بەڵکو بەشێکە لە پلانی
ستراتیژیی سپای ئەمەریکا بۆ "دەستبەسەرداگرتنی ئەو کەشتیانەی" کە لە کاتی
گەمارۆ دەریاییەکانی سەر ڕژیمی ئێراندا، فەرمان و ڕێساکانی سێنتکۆم پێشێل دەکەن. ئامانجی
سەرەکی ئەم ئۆپەراسیۆنانە ڕێگریکردنە لە هەر هەوڵێکی ڕژیمی ئێران بۆ دەربازبوون لە
سزاکان یان گواستنەوەی نایاسایی کەلوپەل و چەک لە ڕێگەی دەریاوە.
==========
سێنتکۆم لە ڕاگەیەندراوەکەیدا پێداگریی کردووەتەوە کە مەبەست لەم مانۆڕە:
١- پاراستنی ئاستی باڵای ئامادەباشیی هێزەکانە. ٢- گەرەنتی کردنی وەڵامدانەوەی
خێرا و کاریگەرە بۆ ئەرکە دەریاییە هەستیارەکان. ٣- سەپاندنی سەروەریی دەریایی
و ڕێگریکردن لەو کەشتیانەی یاسا نێودەوڵەتییەکان دەبەزێنن.
============
ئەم جووڵانەی هێزی دەریایی ئەمەریکا لە کاتێکدایە کە ناوچەی کەنداو و
دەریای سوور بە گرژییەکی زۆردا تێدەپەڕن. ئەم مەشقانە نیشانی دەدەن کە
واشنتۆن بژاردەی سەربازی و گەمارۆی دەریایی وەک ئامرازێکی سەرەکی بۆ
سنووردارکردنی هەژموونی ڕژیمی ئێران لە ناوچەکەدا بە کراوەیی هێشتووەتەوە.
